THE FEAR (Mizo)

                Zan lam boruak chu a vawt vin tûk mai a, thli thaw ri pawh chu a nêlawm tehchiam lo hlê. Ka nupui nên chuan Himalayas a zin kan ni a, a hmun hma vêl rêng rêng mai chu han hawi kual vêl ngial pawhin thil nung hmuh tûr a awm lêm lo a ni. Kawng te lah a zim na rawh, chuvângin car pawh darkar khata 20km bâka chaka khalhna chi a ni lo hrim hrim ringawt mai a ni. Tlân pah chuan kan ti tî dûn mawlh mawlh zêl a, chutihlai tak mai chuan kan car head light chu a pahnihin a thim rual ta ṭhawt mai a.

                Car chu ka ti ding nghal chawt mai a, engtia chutia kan head light chu thim ta teh thut ngawt chu ni ang maw tiin ka ngaihtuah a. Ka nupui chu a ngaih a ngam zân loh avâng chuan ka han ṭawng thlamuan hmasa tê tê a, chutah kei chu car aṭanga chhuakin ani chu lo ṭhu rih tûr chuan ka ti a. Chumi aṭang chiah chuan chûng lai tlángsáng pui pui chhunlama hmuhnawm theih zia ka hrechhuak ṭan ta chauh a ni. Zan thimzia lah chu ai mit thlawn ang hlauh a niin, car chhunga ka nupui ṭhu pawh ka hmu thei lo rêng rêng a. Ani lah thlamuang hek suh, zan lama ramsa chaw zawng chi ho hlau ta rêng rêng chuan car chhunga lût tûr chuan mi ko chhên a, mahse zêp nâk emaw, a chhan dik tak chu ka ni reng si. Keimahah chuan chianglo a awm a, ka chau ru tlat a ni. Zan lah chu a inṭan leih leih emaw a ni chauh mai lehnghal a, chubâkah kan car chu kawng lai tak maiah chuan ala ding leh ta dah a, chuvângin miin min rawn sut palh mai a hlauhthâwnawm hle a ni. Vênthawn tûra pui a tam duh khawp mai.

                Chutah pawnah chuan ka chhuak leh a, chulaia kalkawng tâwp dan chu ka va belchiang chhin ta a, kan hnuailam hla deuh taka lui luang ri chu fiah lo tak hian ka hre thei viai viai a, chuvângin kan awmna chu a tlángsáng thawkhat a ni tih ka manthiam mai a, a hnu chuan car-ah chuan ka kîr a, chulaiah chuan kan riah mai a ngai dawn thu hrilh in, muthilh tum tûrin ka ti ta a, tichuan, chhunglam aṭanga car kawngkhar chu kalhin, a chhungah chuan ka ṭhu ta rân mai a, thâwm riva maksak pui pui chi hrang hrang hi ralkhat aṭang chuan hriat tûr tâwk a awm reng a, an ngaithlâknawm tehchiam lo leh nghal a. Hun lah chu a kal muangin, a ding ta hial emaw tih tûr hi a ni a, chulai karin khua lah chu a vawt tial tial bawk a, ka nupui chu seat hnunga va mu zál tûr chuan ka ti a, mahse a insawn bik chuang hlei lo va, Nakinah chuan zung tûrin ka han chhuak a, chuta car sira ka va chhuah chuan car kawngkhar hnung zâwk bula nu pakhat lo ṭhu ngawi reng ka han hmuh tâkah chuan ka hlau ru ta hle mai a, chu nu chuan mi lo en reng mai leh nghal a, chu chuan ka thauvah min man a, ka khawng titih ta der mai a, chutianga tláng sánga lirthei a chesual te thil tawn leh thlahráng ili vêk te ngei pawh chu ka lo hre ve nual tawh ṭhin reng a, ka nupui chuan lût tûrin mi rawn au a, thaw ṭha mang lo chung chuan ka lût ve leh ta mai a. Ka hlauh êm avâng chuan ka khûr hlawk hlawk a, chu chu kan nu chuan a hmuhin thil awmdan chu mi zawt ta nghal a. Chutihlai chuan car hnunglam tukverh darthlalang chhana chu nu kut rawn lang chu ka va hmu ta a. Mahse kan nu hnênah chuan engmah ka sawi chhuak chuang lo a ni. Hmalam sira darthlalangah chuan chu thlahráng nu kut chu ka hmu thei reng a, mahse amah va en tûr tak chuan ka hawilêt thei chuang hauh lo thung a ni! www.zolinks.com

                Engemaw tak thleng tûr a awm tih chu ka hre tho nâin, kan nupa a dan theih chi rual erawh a ni lo thung. Chulaia mi chu a eng thil pawh ni lo nise, min kalsan tûrin ka rilru in, ka han ṭawngṭai leh ngawt a, ka hlauvin ka mangang ru takzet a ni. Chutah chiah chuan kan nunna hlut zia ka hrechhuak chiang kher mai le. Thil awmzia kan nu ka hrilh chuan a fel dawn si lo chutiang lampang hlau chi chu a ni lehnghal a, chuvângin ka hrilh vaih chuan a ranglama chulai tlansan tûr chuan thim hnuai pawh nise, mi nawr chiam dawn a ni tih ka hre sa reng a ni. Chutah khawdang hawisawnin ka ngawi ta reng ringawt a. Chutianga a bula ka awm ngai loh avâng chuan ani lah chu a dilchhût ang tulh tulh a, thil awmzia chu mi nawn chhên a, mahse nakin deuha darthlalang ka han thlir leh chuan a lo awm ta lo va, ka thawveng ru ta huai a, mahse ka ngaihṭhatna chuan a daih rei lo hle thung a ni.

                A hnu lawk chuan kan nu chuan intih harh nan pawna chhuah a duhthu a sawi ta a. A sawi rual chuan kei chuan ka lo hnial nghal vat a, a chhan chu pawnah chuan eng emaw tak a awm tih ka hriat vang chauh a ni. Ani ka nupui lah chu ka tan a hlu hle mai si a, ka chán mai thei lo vang! Ani lah chuan minute 2 bâk a ni lo vang tiin mi a la kar zui ta chhên mai lehnghal a, khua a var lo tehzawng a ni.  www.zolinks.com

                Chutia mi nawr chhên avâng chuan pawnlam chu ka va enchiang hmasa phawt ang e tiin a hnuah chuan ka chhang ta a. Dik tak chuan car pawn a chhuah chu ka châk hauh lo a ni. Mahse thil awmdanah chuan a ngai bawk si a ni. Chutah pawnah chuan ka va chhuak ta nge nge a.

                Hetihlai hun kher kher hi chu ka damchhunga ka hlauh ber lai a la ni hial ang. Ka chhuah rual rual chuan ka han hawi hual nghal a, mahse tumah an lo awm lo va, chutah kan nu chu ka ko chhuak ta chauh a ni. Ani pawh chuan pawn boruak chu a rawn hip ve ta a, tichuan rei vak lo hnuah chuan kan lût leh ta a. Chutia hlauh tûr awm lo va kan awm ta chu ka lâwm hle a ni.

                Chuta car a ka han lût leh ta chu lum nuam hle hian kan hria a, heater hmanga tihlum ang mai ni hian kan hria. Chutiang tûr chuan car a heater chu ka ‘on’ lo tih ka hria, mahse a boruak chu a lum miau si a ni. A hnuah chuan a chhan chu ka hre ta thuai a. Thil râpthlâk lehzual chu a lo la thleng dawn chauh mai hi a lo ni lekfang a!  www.zolinks.com

                Side glass aṭang chuan hnunglam seat a nu pakhat ṭhu chu ka va hmu ta thut mai a, ka mitah tak hian min rawn en kuau mai lehnghal a, ka phu chiang kher mai! Ka thauvah a man a, ka chesawn thei hauh lo mai a, ka hmel a hmuh chuan ka nupui chuan thil awmzia chu mi han zâwt leh ta a, engmah hlauh ka nei ngai lo tih chu a hria, mahse chutihlai kher kher chuan a hresual chiang hle a ni, hlauh ka lo nei na meuh mai, a hma chuan ka hlauh tak tak thil ka lo la tawng lo mai chauh a ni zâwk!

                Thil awmzia chu mi zâwt nawn sek a, ka ngawi reng a, ka ká a chih tlat a tin ni. Chutah seat hnunglam a va hawi phei a, a shawl chu a vuan ta chawt a. A kut chu vawn sakin a mitah chuan ka han en a, ani chuan enge a awmzia mi la zâwt ta cheuva! Seat hnunglama ṭhu chu a hmu ve thei der lo mai a nih chu…! Car a chuan reng pawh ka duh lo, mahse ka nupui hnêna thil awmdan ka hrilh a nih chuan a tlânchhe chhuak ang a, buaina zakhua a thleng mai dawn si a ni. Chutah rilru hian ka ṭawngṭai ru leh ta ringawt a.

                Tûnah chuan zing dar 4 a ri ta in, kan car chhung pawh chu a vawt ṭan ve ta a, chumi hnu deuh hlekah chuan boruak chu a pangngai veleh ta chauh a. Kan seat hnunglama nu pakhat ṭhu ve pawh chu a bo ta daih bawk a. Chutih lai chuan ni hi a rawn chhuak dawn suar suar a. Motor chu ka han ti nung a, car hmalam mit te pawh chu engmah thleng lo ang mai hian an lo êng chhuak leh thei ta lawi a! Tichuan, kan tlân ṭan leh ta a, a hnu lawk chuan ni êngin min rawn chhun ta phung a. Ka thawveng ta huai tak nâin heta ka thil tawn hi chu ka theihnghilh leh thei ta rêng rêng lo thung a ni.

                Chulai aṭanga hla lutuk lo kan va thlen chuan Hotel lian tehchiam lo hi kan va thleng a, chuta thlen chu tumin pindan kan la ta nghal a, chu hotel chu a hlui tawh ang reng khawp mai a, mahse a dang erawh a awm chuang lo a ni. Tichuan, breakfast kan eizawhin kan pindan lam chu kan pan a, kan mu hahdam ta nghal a, kan nupa chuan kan chau dûnin, a hma zan chuan mut kan hmu lo bawk nên, nileng chuan kan muhil zui ta a. Khua pawh a lo thim leh tawh hial zâwk a ni.  www.zolinks.com

                Nakin deuhvah chuan kan kawngka chu an rawn kik a, ka va hawn chuan putar pakhat hi sathaukhawnvar kengin a lo ding a, light thim thut a chhit atan chu chu min rawn pe a, kei chuan ka la a, a hma zana thil thleng chu ka ngaihtuah lêt ta a.

                A hnu chuan kan nu chu zanriah ei tûrin ka kaitho ta a, mahse ala chauh rih êm avâng chuan a tho peih lo va. Hemi zan hi thla bial zan a nih avângin kan piah mai ngaw a thingkung te pawh an lang iar a, ka ril a ṭàm êm avâng chuan chaw lo zuk ei mai chu ka rilrûk ta a, tichuan ka nupui mutui lai chu kalsanin hotel khualchhâwntu awmnaah chuan ka kal a, pawnlama ngaw thlir theihna laiah chuan ṭhuthmun ka rem ta a, chutah eitûr min rawn chhawksak deuh hnu lawk chuan light chu a thim ta thut mai a, kan nu ka ngaihtuah vâng chuan ka ding nghâl hluai a, kan pinda pan chuan ka tlân ta si lo va ni. Nakinah chuan mikhual awmchhun kan ni tih ka hrechhuak ta a. Ka mobile a torch hmang chuan kan pindan chu ka zawng hmu ta a, chuta kawngka ka han hawna ka thil hmuh chu khawvêla ka thil hmuh châk loh ber thil hi a ni. Car-a ka hmuh hnu bawk kha ka nupui bulah chuan lo dingin, a lo nuih deuh sáng a, ka nupui lam pan chuan ka tlân phei nghal vat a. Ko chiam chung hian ka han pawm zui a, ani chuan mak a tih hmel nasa mai a. Insuam tûrin ka ti a, hotel chu chhuahsan nghal ka rilrûk a ni. Pawnlam boruakin a zir loh avângin chuta riah mai chu ani chuan a rawt a, ka thil tawn chu ka hrilh chuan a muhil thei dawn si lo va, chuvângin engmah hrilh lo chuan rizai hnuaiah chuan ka inthawlh ve ta zâwk a, dar 11:30 hnu chuan ka muhil thei ta chauh va.  www.zolinks.com

                Zing dar 2-ah chuan tuemaw hian tukverh chu an rawn kik a, ka han men chuan a hma a nu ka hmuh tho khân tukverh pawnlam aṭang chuan mi lo thlir reng mai a, ka mobile a torch hmang chuan ka zawng kual ta a. Chutihlai chuan kil khatah hian thâwm ka hria a, ka nupui ngei mai chu a lo ni a, aniu pawh chuan ka mi hmuh nu chu a lo en ve reng bawk a, mahse a hlauh êm avângin a kha chu a chih tlat a, au pawh a au chhuak thei lo a ni. A lamah chuan ka tlân phei nghal a, ka va pawm chawt a, tukverh lam chu a kâwk a, mipa hmuh a nei tih a sawi a, kei chuan mipa ni lo vin, hmeichhia a nih thu ka hrilh a, ani chuan mipa anih thu ngei sawiin a ṭang ve tlat a.

                Mahse tûnah chuan engmah hmuh tûr a awm tawh lo va, a bo leh ta daih a ni. Chutah a hma zana thil awmdan zawng zawng chu ka hrilh ve ta vek a, keiin hmeichhia ka hmu a, ani’n mipa a hmu chu mak a ti hle a. Chutah chutiang teh hrep chu, tiin chu hotel chu chhuahsan mai zai kan rél ta a. Chuta hotel chhuahsan tûra kan kalta chuan zuitu kan nei ni hian kan hre leh ta a. Mahse amah taka kan hmu thei bawk si lo. Chuti chung chuan kan car awmna chu kan pan a, kan nupa chuan ka ṭhu fel ta a.

                Car chu ka han ti nung a, mahse head light chu a êng thei lo leh ta tlat mai a, hlau fe hian kan inen a, kan ngawi chiang kher mai. Chutah thâwklehkhatah chhum chhah tak mai hian chulai vêl chu a rawn tuam thut a, kan hma metre khat bâk chu kan hmu thei ta lo a. Chutah min tibuaitute chuan min chhuah an tum hauh lo ni hian ka hria a, mahse engnge kan lakah an duh erawh chu kan hre chuang bawk si lo a ni.

                Chutia a vawh zual tak zêl avâng chuan hotel chhunga luh leh mai chu ka rawt a, mahse kan nu chuan a ngam tlat lo a ni. Chutiang a nih avâng chuan car chhungah bawk chuan kan tawm leh ta a. Kan zinkualna pawh chu chhunzawm lo va, chulai aṭanga hàw leh daih chu kan tum ta nghe nghe a ni.

                Chutia darkar 2 lai kan nghah hnu pawh chuan engmah thil thleng a awmzui ta lem lo va, mahse engemaw tak thleng tûr erawh chuan kan ring thung. Nakin deuhvah chuan kan car lama lo phei thâwm hi kan hre ta a, a lokal chak hle nghe nghe a ni. Chutah darthlalang hmalama mi ah chuan “inbulah ka awm zêl ang” tih hi a rawn inziak ta kulh mai a. Car-a wiper chu ka han on a, mahse a thu ziak chu a reh thei chuang si lo. Car hmalam darthlalangah chuan ziak ang maiin a fiah kalh mai a ni.

                Chutah ka nupui chuan, “Tunge i nih? Engnge kan lakah duh i neih” a han ti tuar a.

                Chhángtu rêng rêng an bawk si lo. A reh hian a reh vung vung ringawt mai a ni.

                Ni a lo chhuak a, kalkawng pawh chu a hmuhchian theih ta a, hetah tak hian han hawi vêl a, hotel hmuh tûr awzawng a lo awm ta hauh lo mai a, kawnglai tak maiah kan lo ding reng mai a, kan chunglamah chuan thingkung lianpui hi a awm a, car aṭang chuan chhuakin ka han hawi kual vêl a, engmah hmuh tûr a awm lo tak tak a ni.  www.zolinks.com

                Engpawhnise, chutia ni a lo chhuah tâkah chuan chak tak hian kan tlânkîr ta a, chutia darkar 4 zet kan tlân hnu chuan kawng chu “T” ang chiah hi a lo ni ta a, a bulah chuan Road sign engmah intar a awm bawk si lo, zawh lam tûr hriat a har ta hle mai a. Chutah veilam kawng chu a hnum ṭhat ber avâng chuan kan zawh ta ngawt a. Nakin deuhah chuan cafe pakhat hi kan hmu bawk a, kawng chin zawh tûr chutia kan tawn avâng chuan ka nupui chu a hlim ta hle a. Cafe-ah chuan thingpui te inin, chaw te kan ei nghal a, chutah neitunu hnenah chuan kan lo kalna lama hotel emaw, mipa/hmeichhe thlahrang chanchin a hriat leh hriat loh ka zâwt chhin ta ngawt a. Mahse chutiang awm a hriat loh thu in mi chháng a. Chutah tlai lam a nih tawh avâng leh chulai tlángsáng zêl phei chu chhuahsan thuai kan duh avângin kan tlân ṭan leh ta a. Chau chung chung chuan car chu ka khalh lui hrâm hrâm zêl a, ding vaih ila chuan chulai hmun hráng tak mai chu kan tlânsan tak tak dawn ngût hian ka hre lo a ni.

                A hnu deuhah chuan khua chu a lo thim leh ta a, ka nupui mitmeng chu hlauhna in akhat a, ngawi reng hian a hawi kual reng mai a ni. Intih harhna atán car chu ka han tiding leh rih a, pawna chhuakin kan han hawi kual ngial a, mahse zan thim hnuaiah chuan engmah hmuh tûr a awm lo. Chutah ka car lam pan chuan ka kal leh chiah tih in, ka hming hian ka hnunglam aṭang chuan min rawn ko ta thut mai a. Ka han hawilêt chuan ka hmeichhe hmuh ṭhin nu leh pa pakhat hi ka hmalamah chuan an lo ding dûn a, “I bulah ka awm zêl ang” nu chuan mi han ti a. Ka car lam pan chuan ka tlân chiam a, chak tak chuan ka tlânchhuak ta nghal a, engemaw thil thleng a awm leh ta tih hriain, ka nupui chu a ṭap ṭan ta a, kan head light chu a thim tak loh avângin kan tlân zui ta char char a. Rei fe hnuah chuan khawpuia êng de chuai chuai chu kan hmu thei ta a.  www.zolinks.com

                Kan hlimin kan lawm kher mai. Kan nupa chuan kan inkuah ta vawng vawng a. Thihna chu pumpelhin kan dam khawchhuak ta a ni.

                Tichuan, kan in pawh kan thleng ve leh ta a.

                Vawiin chu kan nu party-naa a kal avângin mahni chauhvin ka awm a, chutihlai chuan light a rawn thim a,a lo ên leh chuan kan darthlalangah “I bulah ka awm zêl ang” tih lo inziak chu ka hmu ta a.     

                Ka hlauh ber chu mahni a awm hi a ni. 🙂

LEAVE A REPLY

Please enter your comment!
Please enter your name here