PORTUGAL KHAWPUI LISBON LIRNGHING CHU

                Mi thianghlimte Ní an tih ṭhin November 1, 1755 chu a lo inherchhuak a, he ní lo herchhuak hi Lisbon khawpui chungah chuan a thiangin a êng nual hlê mai a. He khawpui hi Rome khawpui ang bawkin Tláng pasarih ṭhut thei hial khawpa liana din a niin Tagus luipui chhuah taka awm a ni nghe nghe a ni.

                Kum zabi 18-na laihawl (1750) vêl aṭang tawh khan he khawpuiah hian mihring 275000 zet mai an lo chêng tawh a. Europe rama sumdàwnna hmunpui leh pawimawh ber berte zinga pakhat a nih ve avângin ram hla tak tak aṭang pawhin mi hausa leh kei ka ni inti pha chin chu an fuankhâwm tup tup reng ṭhin a ni. Chutiang chu lo ni tawh ṭhin mah se tun lai hriatna leh finna rilru aṭanga han thlir chuan khawpui hlui leh hnufual tak, hma a sâwnna lam aia khawpui hlun a lo nih tawh zâwkna hian mi hriat a hlawh zâwk mah a ni.

                Mi thianghlimte N’i (All Saints’ Day) zing 9:40 a.m. a lo thlen meuh chuan ni mak danglam tak leh rapthlâk tak – Van boruak hla taka khawpui ri hluk hluk ang maiin thâwm rî chu a lo awm ta. Hetih laia mita lo thlirtu leh hretu pakhat chuan “Lisbon khawpui chu tih ram leh suasamin a awm dawn ta” tiin a manganzia a auchhuahpui nghe nghe a ni. Biak In dár tin mai chu anmahniin an inkhawng ri chuah chuah ta mai a. Sathau khawnvar Biak In (Cathedral)  chhunga an chhit tlar dul te chu an thle suau suau mai bawk a. Biak In building ngei pawh chu a lungphûm lamin a nghing dur dur ta mai a ni. Mi mangangte leh buai phili tak tam te chu Biak In tual zawlah lo tlân khâwmin chhiatna laka chhanchhuahna dilin an ṭawngṭai nghal ta mur mur a. Rei pawh a inrial hman lo tihah chuan a hma aia rapthlâk leh hlauhawm zâwk leh nasa zâwkin chu khawpui chu a rawn sâwinghing leh ta dur dur mai. Tunah zet chuan lirnghing hmasa zâwkin building lian pui puite pawh chuan tuar zo lovin an thi tlu ta dur dur mai a. Biak In builidng tam zâwk leh St. Anthony building te ngei pawh chu a chhe ta rup mai a ni. Mi pakhat dam khawchhuak chuan, “Mahni hmun hmuna thi ta te ruang tlu rem rum chu an insawikhâwm nul mai a ni” tiin a sawi nghe nghe a ni. Chu chhiatna rapthlâk tak chuan Lisbon khawpui pum pui chu a chim chhuak vek a, a bik takin luipui chhuah lam hmun hniam zâwkah te a zualkai bik a, helai hmunah hi chuan Biak In leh rawngbawltute chênna In te, Dàwr tê leh Dàwr lian te, Lal chênna hmun te, In pangngaite chu lirnghîng fâwn vêl hian a suasam nasa hlê a ni.

                British sumdáwng mi hausa Braddock-a hetih hun laia Lisbon khawpui han tlawhtu chuan a lehkhabuah hetiang hian a ziak nghe nghe a ni – Lirnghing vawi hnihna a lo thlen leh meuh kha chuan a nata a’n natzia chu ka chênna in chhawng chung zâwk chu a tlu thla nghal a, ka chênna chhâwng khatna erawh chu a tlu chhe nghal mai lo va, ka kète ka hmerkhâwm a, thih hun nghâka ṭhutsawp mai loh chu engmah beisei tur rêng a awm tawh lo, ka awmna pindan bangte chu an thle tawn hlawk hlawk bawk a, hmun tin maiah bangte chu lo inṭhiat darhin, chûng aṭang chuan hmun tin hawiin lung a rawn tla thla zung zung a, in chung aṭang chuan in chhùnte pawh chu an inkhawh chhuak zawrh zawrh bawk a. Chutih laia vân boruak han thimzia leh beidawn thlâkzia chu engmah hi ka thliar hrang thei hlawl lo a ni,” a ti hial a ni. www.zolinks.com

                Lisbon khawpui cheimawitu bulding ṭha tak tak leh ropui tam tak chu rei lo te chhungin tihchhiat an ni zo ta. Lirnghingte a lo reh hnua thil awmzia an han chhûtchian chuan lirnghing tuar in 20,000-ah 17,000 chu a tlu keh darh zo ta niin an hria a ni. In tlûkchhiat leh kawhsawm avânga vaivut khu zám chuan zing ni êng mawi tak mai chu a khuh hial thei a ni. A nghing hmasak ber aṭanga minute 15 hnuah chuan duhtâwk lo ni âwm takin a ai maha nasa zâwk a lo thleng ta cheu mai, engtizia nge ni ta ang le? Mit ngeia hmutu leh hretu Portugal mî, Antonia Pereira chuan, “Lisbon khawpui leh a chhehvêl ram leilung chu tuifâwn ko bur bur leh invawrh hlup hlup ang hian a awm ni berin ka hria,” a ti hial a ni. He khawpui hian vawi eng emaw zât lirnghing lo tuarin ni tam tak chhungin lo thleng zeuh zeuh tawh mah sela, hemi nía lo thleng hmasa pathumten minute 15 chhung leka chhiatna rapthlâk an thlen tluka nasa hi Lisbon khawpuiah hian a la tawng ngai lo.

                Vân boruaka vaivut khu zámte a reh a, lei lama an lo tlâk khâwm leh tak hnuah chuan biak in khawnvàr an chhit tlar dul tlu darh aṭangte leh tapchhak zawla mei tihmih lohva la nung reng ta te aṭang chuan meipui lo irh chhuakin hmun tin mai ah bû an khuar ta chuah chuah mai a. Hêng meipui lo inhlap chhuakte chu hmarchhak thliin khawpui laili lam hawiin a rawn beng leh ta bawk si nên, lirnghing tihchhiat bâk in ding la awm zawng zawngte kângfai turin meialh hlâwm chuan khawpui kawtthlêr chu an fang dul dul a ni ta ber mai. Dàwr neituten an bungruate chuhin Terreiro do Paco hmunah an chhêk khâwm a. Mahse, meialh vak vel chuan luipui máwi tak kam khawpui an cheibàwlte leh bungraw chhêk khâwmte chu a kàng fai zo leh ta a ni. Hmun tin maia thil hlui an khâwlkhâwmte leh dawr lian pui pui Silk leh Mosola-a khat tlatte chu meipui chhèmna atana thingtuahah an chang zo ta a ni. Chhiatna karah pawh hian dama zuah hi an awm fo ṭhin rêng a, hê lirnghingin a tihchhiatna khurpui chhungah ngei pawh hian ding khawchhuak an awm hlauh mai, chungte chu – Lemchanna in sak thar te, Kohhran enkawltu (Patriarch) chênna in te, lal in leh a cheibawlna ropui tak te leh Libraries – Lekhabu chi hrang hrang 70,000 lai dahna hmun te an ni a. Hriat hmaih hauh loh tur Lisbon khawpuia thil awm, abîk takin English Protestant-ho zinga an building kàng hmasa berte zinga pakhat chu Headquarter of Inquisition (Rinnaa kal pengte hrem dan kawng an ngaihtuahna hmun) a ni. Suja khawtthlêra Brothel an tih pawh a him zingah a tel ve hlauh chu mî te nuih tizatu a ni ve tlat mai le. Broddock-a chuan hê thihna rapthlâk takina a tuam vêlna karah hian nu a fa duhtak a pawm lai te, nula thawmhnaw manto tak taka inchei te, puithiam te, Friar-te (hmasang Catholic puithiam chi khat) tlangval te, khawl lam hnathawk te, hnungzáng emaw malpui ruh tliak vânga thi te, ṭhenkhat lungin an áwmbáwr a densak te, ṭhenkhat taksa bung hrang hlohte leh bawlhhlawh zinga in vûr ta te an nih thu a ziak a ni.  www.zolinks.com

                Mi dangte ang bawkin hetih hun lai hian Braddock-a pawh chuan theihtâwp chhuaha inchhanhim tumin sailungvar leh mitthi ruang zingah chuan ṭan lain Tagus luipui kam pan tumin a bei a, lung tlàin a dénghlum hman lo chauh a ni. A nghin hmasak ber aṭanga darkar khat hnuah chuan luipui chhuaha mipui zi nuai nuai karah dingin Braddoc-a chuan mi pakhat au âw a hria a, chu mi chu “Tuipui (Sea) chuan min chim ta, kan boral dawn ta a nih hi,” a ti a. ( The sea is coming in; we shal be all lost). Tuifâwn so sáng a lo kiam leh tâk hnuah chuan thâwklehkhatah Tagus luipui tui chu namén lovin a lo so sang leh ta thut mai a, chu luipui tui so sang chuan khawpui chu a khuh thla ta dul dul mai bawk a. He mi chungchang thu hi Braddock-a chuan ti hian a sawi a, “Vawilehkhatah tláng lian pui ang maia chu tui lo so sáng leh invawrh chho chu inchhanhim nân tiin theihtâwpa rangin tlanchhiatsan ka’n tum a, mi tam tak chu tui len bova awmin tam tak chu vaukamah an inhamtáng ṭawk ṭawk a. Kei erawh chu, chu lái hmuna thingluang chu man fuh palh ta hlauhvin, thei leh thei lovin harsa tak chungin ka inchhanhim thei ta hrâm a ni. Chuti ni lo se chuan tuifâwn chuan min la telin min vawrh hlum ngei ang,” a ti a ni.

                Hemi chungchang thu Braddoc-a sawi hi lirnghing avânga lo awm fo ṭhin, tuifâwn invawrh nasat theih ṭhin dan leh lo awm theih thu a ni deuh ber a. Minute tam pawh a liam hmain vawi thum ngawt a lo thleng hman a, a ṭhen phei chu feet 50 laia sang te an ni nghe nghe a ni. Hetia tuifâwn so sáng a lo awm tâkah chuan a kir leh lam khan mi tam tak chu mangang au ráwl nên an chatuan hmun pan turin Tagus lui lamah chuan a hnûk lêt leh ta hlawm a, Lisbon khawpuia mi chêngte chuan khawvel hian a hun tàwp a thleng dawn a ni ang e, an ti hial a ni. www.zolinks.com

                An chhût danah chuan Lisbon khawpuia hliam tuar mî 15000 aṭanga 70000 vêlah mî 30000 chuan an thih phah ngei niin an hria a ni. Africa hmar lam leh Morocco ram ang bawkin Portugal chhimthlang ramin a tuar nasa lehzual a, a nghin der der thu hi chu Portugal ram pum pui te, Spain ram te, France chhim lam ram te leh a hmar lam thlengin an lo hre ve bawk a. Khawnvâr (Chandleliers) thle tawn vêl pawh hi Holland leh Germany ram thlengin a thleng ve nghal bawk. Lirnghingin tuifâwn a siam pawh hi England rama an lo chhinchhiah danah chuan 2:00 p.m. a ni a, a hnu darkar 4-ah chuan West Indies-ah an lo hre zui nghal bawk a ni. Hemi ni hian Europe ram pum puia Dil tui chîm sân záwng te, lui tui chîm sân dan te, tui irhchhuak leh tui luankawr awmdan te chu a hma ang lo takin an danglam deuh vek a ni.

                Lisbon khawpui nghin dur dur lai leh a kan hluah hluah hun lai khan rukrù thiam loh changa lung In tángte chu chhiatna rapthlâk tak tak karah an lo tlânchhuak bawk a, bâwih rualho lawng kartu atána an hmante pawh chuan an púte thi emaw dam emaw chhiat lai denchhenin an lo tâlchhuak bawk a. Lisbon khawpui tualzáwl leh kawtthlêr chu mi tam tak khawi lam nge pan tur tih pawh hre chuang lo leh thih hun nghâk ta mai tein an lo khat zo ta. Mei alh dur dur leh nghing dur dur te leh a aia nasa zâwk lo thlen leh rin avânga hlauhna chuan mi te rilru a ti chiaiin, raltlânho buai nuai nuaina avâng chuan khawpui tlânchhuahsanna tur kawngpui pawh chu a lo ping zo ta a. Hmun tin maia thihna leh chhiatna avâng chuan Portugal sawrkar pawhin rorêlna a tlanchhiatsan ta, mi pakhat tal roréltu tur atana mawhphur ngamtu an awm hma chuan tuman mawh an la ngam tawh lo a ni. He mawhphurhna latu hi kum 56-a upa Minister for War and Foreign Affairs, Sebastian Jose de Carvalhoe Mello, nakin hnua Marquis de Pombal-a chu lo lawmin Lisbon khawpui chunga thuneihna a lo pe a. Ni rei lote chhúng chu ama inah chêngin a nupuiin anhnah a tlakna tuihángte chu han in tê têin Lisbon dinthar leh zai an rél ta a ni.

                Rállâk sum latute leh hnathawktu themthiam hote tlânchhuak tur veng turin Pombal-a chuan sipai pawl a din a, Lisbon khawpui kawngkhar tinah a dah hlawm a. Kang ṭhelhtu pawl leh in ṭhian pawl a din bawk a, tin, mitthi ruangte chu tuipuia phumpil phalna kohhran hnen aṭangin a la bawk a ni. Chutianga a tih avâng chuan mitthi ruang ṭawih rimchhe tur leh natna lo puangdarh thei tur lakah khawpui chu a vawng thianghlim thei ta a. In nei lote tán in sak dan tur a ruahman nghal a, ei rawngbawlna leh chaw semna hmun tur a ruahman nghal bawk a ni. Ramdang sumdawng lawng leh Portugal mi te chu an ramah an bungruate dah lûta lirnghing hmaa an zawrhna rate anga zuar turin a ngèn hlawm bawk a. In luah man te tisang lo tur leh ram neitute chu an hlawhfa chhawrte bàn mai lo turin a ti bawk a ni. Rukrûkna tirem turin khaihlumna hmunte a siam a, chungah chuan mi 34 lai rukrûk ching vantláng mithmuhin khaihlum an ni. www.zolinks.com

                Pombal-a kaihhruaina hnuaiah hian Lisbon khawpui chu dinthar a lo ni leh ta a. Chunai siamna te, leirawhchan siamna te leh Tile siamna hmunte chu a chak thei ang berin a din chho bawk a ni. Mipui huatna tihbona turin kohhran rawngbawltute thu a ram sualnaa inhnamhnawih lo tur leh Pathian duh lo záwng thil tih pumpelha invawng thianghlim turin a ngèn nghal bawk a ni. Minister fing var deuh te chu he chhiatna chungchang thua titî vak leng vêlte an rilrua vawng tlat turin a hrilh a. Chanchinbu Gazeta de Lisbon pawhin a chhuah hmain ngai lo a ni. Insumdàwn tawnna (Commerce) hi he khawpui intunnunna bulpui a ni a. Portuguese lawngrual te chu zin chhuakin an ram awpte leh sumdàwnpuite tan an ram dinhmun tinghet zel chungin Lisbon chu sumdâwnna hmunpui a lo ni leh thei ta a ni. Thla tam a ral hma chuan Pombal-a chuan khawpui dinthar lehna tur atan ruahmanna fel tak a duang chhuak ta a. Vawiin nia Lisbon khawpui chuanhnuai (Lisbon Baix) Pombal-a thlir lâwk anga din chhuah chu tun laia Europe ram (18 century) khawpui ruahmanna kawnga entawn tlâk berte zinga mî a lo ni ta a ni.

                Lisbon khawpui din thar lehna atán hian hma la chak hlê mahse, a chhiat lo tawhna hian Europe ram mipuite rilru a luah khat hneh hlê reng a. Engvânga Lisbon hian Pathian thinurna lo tuar ta nge a nih tâk mai? (Portuguese sakhaw rawngbawltute chuan khawpui hausakna an sawisêlin rinna kawnga kalpéngte tana an dawhtheihna te an dem a, hmar lama Protestant-ho chuan Inquisition leh Popish Indolatry an mawhchhiat bawk a). Engtizia nge Pathianin mi ṭha leh misualte angkhat renga a tihhlum mai a, Suja Street (kawtthlêr) a nawhchizuarho awmna a hima Biak In tam tak a tlûk chhiat tâk zawk? Engati nge heng naupang chhia leh ṭha hriatna thianghlim tak neite tihhlum an ni? Eng nge tum a neih? Heng zawhnate hian Europe khawmualpuia chêngte rilru a luahkhat hlê mai bawk a ni. www.zolinks.com

                Lisbon khawpui chunga thil thleng hian mifing te ngaihtuahna tam berah chuan hriatthiamna rilru aṭang leh engkim siamtu rorel dan han thlirin engkim lo thleng apiang hi kan ṭhat berna tur atan a lo ni tih hi a ni (Every thing that happens is ofr the best). A ṭha zawnga thlirtu leh beiseitute (Optimist) ngaihdana khawvela thil thleng thei zawng zawng zinga a ṭhatna lai lo hmuchhuak a, siam rem tum ràna hmalâkna hi (To reconcile the best of all possible worlds) abîkin Lisbon thil tawnah hian dodalna nasa tak Voltair’s Novel thawnthubu ‘Candide’ an tih chuan a tarlang nasa hlê a. He lirnghing lo thlen laia buai leh mangang, hlau leh khura thisen kai hnuanga vanneih thila lo dam khawchhuak ta hrâm chuan hetiang hian a sawi a, “Khawvêlah he thil lo thleng hi ṭhat tlànna ber tur a nih ngai chuan thil dang lo thleng chu engtiang tak ni ang maw,” (If this is the best of all possible world’s, whatever must the others be alike) a ti a ni.

                He lirnghing tuartu dam khawchhuak leh ta te chung thuah chuan Philosopher-ho inhnialna thlentu tawrhna chu ngaihtuahna rilru pakhat ve lekah a lo ṭang ta a. Lisbon mipuite tana an hmaa tih tur awm chu a nungdamte chhawmdàwl ṭhat leh he lirnghing rapthlâk tak hi an rama a thlen leh tawh lohna tura Pathian hnena ṭawngṭai a ni. www.zolinks.com

                “Thil awm tawhsate hi thil lo la awm tur atána hriatthiamna leh kawngdik min kawhhmuh tu tùr an ni.”

LEAVE A REPLY

Please enter your comment!
Please enter your name here