Nulat Tlangval Laiin

              1. Nula leh tlangval tana incheina ṭha ber chu faina hi a ni. Thawmhnaw hi, man tam tak a ngai lo va. Man tam tak bâl taka hatu ai chuan, man tlem deuh fai taka hatute hi an ngaihsanawm zawk a ni. An thawmhnaw a fai ṭhat chuan leh an nawh mam zaih chuan an taima tih a entir a, a zahawm bik a ni.

              2. Tin, sam bâl hi a máwi lo va, sam fai tak, hlâwm tel tul lo, enkawl ngun tih hriat reng reng hi chu, a mawiin a hmuh a nuam bik bawk. hmuh a nuam mai ni lovin, sam putu chu a taima a ni tih a lantir a, a ngaihsânawm bawk a ni.

              3. Nula tam takte hi an taksa hi a lo thau chuan, dulte a lo kiar duh deuh ṭhin a. Chuvangin, mawina duhin, mi tam takin chaw te ngheiin an bei chiam ṭhin a, mahse chawnghei vak vak hi a ṭha lo va, a hrisêl lo bawk. Chu ai chuan thau duhna chi, thil thlum lam te, sa te, artui te, bawnghnute te ei tlem a ṭha zâwk. Rei lote chhúnga rihna leh thauna tihtlèm tum hi a hrisel lo va, zawi zawia tihtlem hret hret a ṭha zâwk daih a ni. www.zolinks.com

              4. Mihring rêng rêng leh nula leh tlangval te hi, kan sam awmdante a inang lo hle hlawm mai. A ṭhen a ngil lutuk a, a ṭhen a kir lutuk a. Tam tak chu tihkir belh a ngai a, sam herhkirna (roller) te hman ṭuk a ngai ṭhin. Chuti ang sam tihkirna, lua a ther fur laia, tual vêla kal te leh bazara kal te hi a mawi lo viau a ni. A nihna takah chuan, mut dawnah emaw, zing thawh hlimah emaw, mi hmuh loh laia tihkir vek a, tihkir chawp a ni tih kha miin an hriat loh khan a mawi zawk.

              5. Pasal neih dawn ṭepa sam tihdân thlâk ai chuan, pasal neih hma deuh, thla 2 emaw, thla 3 emaw vêlah lo thlâk tawh a ṭha. Tin, sam tihkir chawp ngai tân pawh, inneih ni hma chiaha tihkir ai chuan, a hma kár khat vêl a la awm a, tihkir hi a mawi tâwk chauhin a lang. www.zolinks.com

              6. A hmei apain, nula leh tlangval tan, tleirawl lai kum 14 vêl aṭanga kum 18 thleng, nula tak tak leh tlangval tak tak nih inkâr, taksa a lo ṭhan danglam hun lai vêl hi hman fimkhur a ngai zual a. Hetih laia hun hman ṭhat loh hi, “Sebo hnua se kawng khar” a ang tawh ṭhin a, fimkhur taka, mi mâwl, thil hre lo leh mi chut deuh nih pawh hnial lova ṭhian kawm vak loh leh rual pawl tlêm deuh a ṭha zawk fo.

              7. Nulât-tlangval laia awmdan máwi hriat ṭul tak pakhat chu tuallai lenho laia bus-a chuan a ngaih laia awmdan mawi hi a ni. Bus-a luh dawn hian nula luh tir hmasak a, chhuah dawnah chuan tlangval chhuah hmasak ve thung tur a ni. Bus a tawt viau chuan ke tih chêt tih chêt loh a ṭha bawk.

8. Taxi-a chuanho dawn pawh hian, nula luh hmasak tir a, chhuah dawnah mipa chhuah hmasak a, a ṭul leh nula lo chhuak tur chu nihliap lo zawn emaw, kawngkhar lo chelh emaw hi a ṭha, nula tan a remchang a, a nuam bawk.

              9. Nula leh tlangval tuallai han len hova, nula min kalpui tihpawh hre lo ang maia chak zeta an han kal a, a rûka hah chung chunga nulain kan han ûm ru ṭang ṭang mai hi chu, hrehawm duh ve tak a ni a, an ruala lên leh pawh a châkawm lo sawt ṭhin. Chu ai chuan, nula kal duh dân tâwk awm vêl en thlithlai chunga, an han kal ve thlap hi chu, an kianga lên leh pawh, nula tân chuan a châkawm sawt thei a ni. www.zolinks.com

              10. Nula leh tlangval han len hova, kuvakhâwr emaw, sweets emaw, chewing-gum emaw leh thil engemaw tê tham nula lei beisei zâwk niàwm tak hian an ding leh tlat mai ṭhin a, nula tan chuan beidawngthlâkin a simawm hial ṭhin.

              11. Mizo nula leh tlangvalte hi, thil tihhona neih a, ruaiṭheh lêt lêt hi kan ching fu mai a. Vântlâng thil tihna ah pawh hian, Sâp-hote ai chuan, nula leh tlangvalte hian kal kan uar deuh hlekin a lang a. Hêng hunah te hian, tlangval ṭhenkhat chu, mahni puar tâwka ei mai lova, phâr vui hrai ang maia ei nghek chingte kan awm leh zauh zauh ṭhin a, a mâwi lo hlê a ni.

              12. Mizoram-ah leh Mizo zingah chuan, hmeichhia leh nulatena mi zinga mei zûk ve mai hi a mawi lo lem lova. Mahse mi ramah leh hnamdang zingah chuan, a mawi lo nasa hle mai a, mihur lam rawngkai tur ang hialah an ngai ṭhin a ni.

              13. Nula tân tlangval hnenah emaw, tlangval tan nula hnenah emaw, in han inkawmho laia, in han titi lai chuan, i mita a en ngam lo che a nih chuan, mi zakzum tak a ni tih a lanna a ni mai thei a. Chu bâkah chuan, mi zakzum tak a nih si loh chuan, a ṭawngkam chu i lakah ṭha fuin lang mah sela, i hriat lohah, a rél fo che avangin i mitah a enngam lo che a ni mai thei bawk.

              14. Nula tân pawh, tlangval tan pawh, kan nelzáwng tak emaw, kan zah vak lohte emaw hi, an dàr emawa ben zen mai hi, a mawi lo chauh ni lovin, mi zakthei lo deuhte awmdân a ni. Chuti ang mi lakah chuan fimkhur deuh a ṭha. www.zolinks.com

              15. Mizo nula leh tlangval tena inrim dul dul kan ching hi chu, tunlai chhan a tan chuan, kan hnam ṭhanmawh báwk em ni aw a tih theih tain a lang. Nula in, lehkha a zir duh tih kan hriat pawhin, tlangvalte lên kan ching tlat ṭhin hi a ṭha lo hle. Kan farnute chunga tlangval dang awmdân tur nia kan duh ang khan awm tum ṭheuh ila chuan, thil kan hrethiam sawtin kan ziaawm sawt ṭheuh tùr.

              16. Mizo tlangval ṭhenkhat hian kan Mizo nulate leh hnamdang tlangvál te hi kan inhmelhriattir a. A ṭhen phei chuan, Mizo nulate kan rimnaah hnamdang tlangvalte kan hruai a. Chu mi hnuah, kan nulaten hnamdang tlangval an kawmin, kan hauhin kan thikthu kan tichhe leh fu si a. Chuti ang ai chuan, inhmelhriattir loh leh, nula rimnaa hruai loh mai kha a ṭha zâwkin a rinawm daih mai. Kan hnam dân hre zo tak tak si lovin, a ṭhente phei chuan, kan hnam nula leh hmeichhiate min hmuhsit phah leh hial si ṭhin a.

              17. Nula leh tlangval tam tak hi, an ṭhiante, tlangval leh nulate hnenah chuan, awmdan mawi te hi an hre sawtin, nu leh pa leh unaute kianga an awm hian, an bakin, an thin tihrimte a awl em êm ṭhin a, a dik lo hle. Inchhungah nuam kan tih viau chuan khawvel hi a nuam a ni mai a. Inchhúngah nuam kan tih loh chuan, hmun dang pawh a nuam tak tak thei chuang tawh lo. Chuvangin, nun rêng rêng, hlim tak leh nuam taka hmang tur chuan, inchhunga induat tel tel a, hlim tlan hi, khawvel tinuamtu ber a ni a.Chuvangin, ṭhian ṭha te leh ngaihzawngte kianga, kan ṭawngkam a ṭha a, biak kan nuam ang bawk ang a, in lamah pawh awm tum ṭheuh a ṭha.

              18. Kan ṭhian ṭha tak leh ngaihzawng hial pawh ni sela, midang tu in emaw an biak laiin, khawi hmunah pawh, lo biak buai vea lo inrawlh loh hi, mi fel nihna a ni. I lo biak buai ve chhen ai chuan, i lo biak buai ve loh khan, i ngaihzawng pawh khan, fel leh fing a ti zawk ang che ang a, a ngaisang zâwk daih ang che. Mi fel tak awm dân mâwi hre tak hi chu, min ngaizáwng lotu pawh, min ngaizáwng ta em ni aw tih khawpin an kianga awm hi a nuamin an hawihhawm ṭhin a ni zâwk. www.zolinks.com

              19. Nula leh tlangval inkawmngeih tak emaw, inchhungkhat te emaw leh inngaizawng te tan pawh hian, office-ah leh kawngkam dawr-ah te, inhrik en mai hi a mawi lo hle. Chhia leh ṭha hriatna kim lo, leh mi chhawih deuh te tih âwm tâwk lek a ni. Thil tam tak hi, a hmun azira âwm leh âwm lo te an ni si a.

              20. Nula leh tlangval tana hriat tur pawimawh tak chu, ṭhian kawm fimkhur hi a ni. Nu leh pa tam takin, kan fate sual hi, an ṭhiante sualah kan puh ṭhin a, a dik lo deuh vek zâwk a ni. Nula lerh chuan, mi lerh kawm nuam a ti a, a ṭhianah mi lerh a thlang ṭhin. Chuti angin drugs tih ching chuan drugs tih ching a kâwm a, zu in ching chuan zu in a kawm a, rûkrûk ching chuan rûkrûk ching a kawm ṭhin ani zâwk. Mi ṭha nih reng duh chuan, mi ṭhate chauh, ṭhianah siam reng a ṭha ber. Nu leh pa leh chhúngkhatten kan kawm atana an duh loh ṭhiante chu, kawm chhin miah loh a ṭha ber. www.zolinks.com

Chhun zawm leh tur……. (to be continue 21 – 38)

LEAVE A REPLY

Please enter your comment!
Please enter your name here