MIKE PENCE

                US Vice President Mike Pence chuan Middle East-a Kristiante an indinthar lehna tûra puihna an pêk mang loh ṭhin chu a tàwp tawh tih puang chhuakin, tûnah chuan US State Department chuan Kristiante leh sakhaw zuitu tlém zâwkte a ṭanpui tawh dáwn a ni a ti.

                Kristian páwl pakhat, In Defence of Christians-te nêna zanriah an einaah US Vice President Mike Pence chuan Kristiante leh sakhaw tlêm zâwkte chu US-in a ṭanpui tawh dáwn tih a puang chhuak a, President Donald Trump-a pawhin State Department hnênah thupêk a pe tawh tih a sawi bawk. Pence chuan nasa taka Islamic State-te kut tuartu Kristiante leh sakhaw tlêm zâwkte ṭanpuina tûr hi mi dang kutah ni lovin, anmahni páwl ngei kutah hlan a nih tûr thu a sawi.

                Mike Pence chuan, “Firfiak páwlte’n an tihhlum leh an tihduhdah mêk Kristiante leh sakhaw tlêm zâwkte ṭanpui tûr hian United Nations-ah chauh kan innghat tawh dáwn lo. Hêng mite ṭanpui tûr hian United States chu a pên chhuak ang a, sakhaw pawlte leh anmahni hnam bil pual ngeite nên kan thawk ho tawh dáwn a ni,” a ti. Pence hian UN hma lâk a duh khawp loh thu sawi chhuakin, invênna nei lo zâwkte ṭanpui kawngah UN chu a hlawhchham fo niin a sawi a, hei vâng hian mi tam tak chuan an tuar a, harsatna tawh dân ṭha takin an chhinchhiah a, tihduhdah tuarte nêna an thawh ho dân pawh fel takin an vawng a, hêng mite ṭanpui hi a ngai a ni, mahse, United Nations chuan hêng páwlten ṭanpui an dilna hi a hnâwl fo thung si. Ka ṭhiante u, khatiang ni kha tûnah chuan a liam ta,” a ti.

Coptic Kristianten harsatna an tâwk bang lo :

                Egypt chhim lama Minya Province-ah chuan Coptic Kristianten harsatna an tâwk nasa hle a, ziaawm lam a pan thei meuh lo.

                Minya Province-ah hian thla kalta chhúng khán Biak In pali lai khàr a ni tawh a, heti chung hian Kristianten beih an la tâwk fo va, an ṭawngṭai lai pawh lung hmangin Muslim-ten an tàwng fo ṭhin. Minya biala Coptic Orthodox Archbishop chuan, “Biak In khàr a nih hnuah pawh chawlhkár hnih chhúng chu thuneitute ngaichângin kan ngawi tawh a; mahse, sawrk;arin a tih tûr ti tùra thuneitu a dahte hian eng mah tih an tum lo. Chu bâkah kan ngawih reng avâng hian kan chan a chau telh telh zâwk a, ṭawngṭai ringawt pawh hi dàn bawhchhiatna ang hrim a ni tawh,” tiin a sawi.

                “Chawlhkar hnih chhúnga thil thleng ringawt hi kum hnih chhúnga thil thleng zât ang thuak a ni mai. Biak Inte khàr a ni a, Coptic Kristiante chu kut thlâk an nih bâkah, an bungruate an chhuhsak a ni,” a ti. Sawrkár lam an chak tâwk lo hle a, chu bâkah ṭan lam an nei ṭhin tih sawiin, “Coptic Kristianten beih an tawha, thuneitute hnêna kan thlen ve lah hian thuneitute hian pawisawi zâwkte man lovin, beih tuar zâwkte a man zêl a ni,” a ti bawk.

                Egypt-ah hian za zêla 10 vêl hi Kristian an ni a. Kristiante hi Coptic Orthodox Church an ni ber. He kohhran hi Isua zirtir Marka’n kohhran a din hma pawh hian Kristian ṭhahnem tak chu an awm tawha hriat a ni.

 

Thulâkna : Christianpost & Kristian tlangau

LEAVE A REPLY

Please enter your comment!
Please enter your name here