MAK LEH DANGLAM TE : BUNG 4-NA

                Rail accident rapthlâk takah te, thlawhna kawngkhâr inhawn vânga mi eng emaw zât thihnaah te, bus accident-ah te, car kàngah leh car accident vawi hnihah te telin a dam chhuak a, lottery aṭangin dollar maktaduai khat a la man zui.

                Khawvêl mi vanduai ber zinga miin vânneihna a chan dan chu hetiang hi a ni. Amah hi Croatia mi, music zirtirtu niin, a hming chu Frane Selak a ni a, kum 1929 a piang a ni, a lâr chhan ber chu music lam ni lovin thihna tham accident vawi eng emaw zâta a dam chhuak zêl hi a ni zâwk. Kum 1962 khan Selak chu Sarajevo aṭangin Dubrovnik khuaah rail-in a kal a, rail chuan a kawng zawh sualin vur khang luiah a tla a, mi 17-in an thih phah a ni. Hemi ṭum hian Selak chu a ban ruh a tliak a, a taksaah chuan pem nin nian dang tlem chu awm ve bawk mahse a vâk chhuak thei a. Hemi kum vêk hian Sagreb aṭangin Rijeka khuaah thlawhnain a zin a, vansángah chuan pilot awmna (cockpit) kawngkhâr chu mak tak maiin a pawk nawlh mai a, thlawhnaa chuang mi 19 an thi a, ani bawk hi ran chaw tûr buhpáwl dahkhâwm chungah tak a tla fuh hlauh mai a, hliam ná nei mang lovin zu awm thei a!

                Kum 1966 khan a chuanna Bus chesual chu luiah a tla a, mi 4 an thi a, ani hi ná nei miah lovin a awm lehpek a. Kum 1970 khan a car petrol line dik lo chu a pum a alh phut mai a, ani hi engtin tin emaw kàng lovin a vâk chhuak thei hrâm a. Kum 1973 khan a car kàngah a him leh bawk a, hemi ṭum hi chuan a sam erawh a kàng kir nasa hle thung. Kum 1995 khan Bus chak taka tlânin a su a, vânneihthlâk takin hliam tenau bâk tuar lovin a him lehpek a. Kum 1996 khan a hma lama Truck rawn tlânin a sut dawn avângin a hêl tumna lamah a car chu khàmah a thlâwk thla a, mak deuh maiin ani chu khàm pang thingzárah a táng a, a car chu a tànna hnuai feet 300 vêlah a zu insawh thla a, a kàng chhe nghal vek a ni. www.zolinks.com

                Kum 2003 khan van lamin a chungchang hi an ennawn ni ngei tur a nia! Croatian lottery aṭangin $ maktaduai 1 a man nawlh mai a, a lâwm kher mai.

                Frane-a chuan “ka hun hman dan zawng zawng hi chung lamin min hmuhsak tih ka hre chiang a ni,” a ti a, amaherawh chu Doritos commercial flight a Australia zin erawh a duh hauh lo, ‘a vanneih dan chin fiah leh kher chu a duh tawh lo a ni.’ “Miten ‘khawvêla mi vanduai ber’ ti emaw, ‘mi vannei ber’ ti emawin min sawi pawh nise a dik thei ve ve dawn a ni,” a ti.

                Virginia state-a park ranger Roy C.Sullivan chu kum 1942 leh 1977 inkar khan ṭêkin vawi 7 teh meuh a déng a, a ke zungpui tin pakhat leh a mithmul chiah a chán. Thihna ngei tûr laka chutiang zât a dam khawchhuah hnu chuan kum 1983 khan a bialnuin a bàn avângin a inâwk hlum daih.

                Kum 1902 a Martinique thliarkár Mount Pelee tlang kàngah khan Jail táng, St. Pierre chu a dam chhuak awmchhun a ni.

                Scotland ram tlángsáng vur hmunah kum 1978 khan beram pakhat chu vurin ni 50 zet a khuh hnu-ah an hmu a, a dam chhuak leh tho nia.

                Kum 1988 khan Parachute hmanga zuang thla ṭhin Eddie Turner chuan a ṭhianpa, skydiver, nikhaw hre lova boruaka tla chu lei thlen hma a second sawm vel la awmah a parachute a zuk pawhpharhsak a, a chhan hman chiah! www.zolinks.com

                Mississippi biala loneitu thata puh a ni vângin Will Purvis, kum 20 mi chu rorêltu 12 in kum 1893 khan thiam loh chantirin tihhlum tûrin a chungchangah thutlûkna an siam a. Ani lah chuan ring fe hian, “In zinga a thi hnuhnung ber hi chu a thi lai ka hmu tho tho ang,” a ti piap mai a. A kum leh February thla chuan lu tanna hmanga tihhlum tûrin an hruai a, a hrui suih dik loh vângin lu tanna blade hriam chu a nghawng thleng lo chiahin a ding chut a. Tihhlum tûra an hruai leh hmain engtin tin emaw Jail aṭangin a tlân chhuak a, kum 1898-ah ngaihdam a ni a, kum 20 zet a liam hnuah mi pakhat hian loneitu chu ama thah a ni tih a inpuang a, Purvis-a thah a lo ni awzawng lo chu niin! Purvis chu ni 13 October 1938 khan a thi a, a thih hma ni 3-ah thiam loh chantirtu rorêltu 12 zinga a thi hnuhnung ber chu a lo thi ve chiah bawk.

                Kum 1996 khan Taiwanese nula leh tlangval inngaizawng hi an nu leh pate’n inneih an phal loh avângin intihhlum an tum a. Inawhhlum an tum a, an hlawhchham a, car-in khàmah an inkhalh liam a, chumi hnuah inchhâwng 12-na aṭangin an zuangthla leh a, an la dam chhuak ta cheuva. A tàwpa an beidawng chu intihhlum tumna bansan tawh tûrin an inṭhen hmak.

                British Merchant Navy-a thawk, Poon Lim chu Indopui II-na hun lai khan an lawng torpedo hmanga an kah chhiat hnuah lawng themah a inham tang a, ni 133 hnuah an chhanchhuak.

                Kum 1972 khan Yugoslavia air hostess Vesna Vulovic chu Czechoslovakia ram chung zâwn mel 6-a sángah an thlawhna DC-9 a puak a. Parachute tel lovin him takin lei a thleng. www.zolinks.com

                Samak an inpâwl hian a pa chu a nu chungah darkar khat aia rei mah a bawk ṭhin a, minute 10 dan zêlah a chi a titla ṭhin. Samak ki hi a hmul aṭanga insiam a ni tlat. www.zolinks.com

                Sazu hi a luak thei lo va, a irh ve thei lo bawk. A pumpui pahnih kárah daltu bang a awm vâng leh a ir ṭha a thunun theih loh vâng a ni. Sazupui leh Guinea pig te pawh an luak thei bik lo va, an luak theih loh vâng hian túra hrài an awlsam bik a ni. Luak thei lo mahse luak chhuak kan tih ang hi an nei ve tho va, thil ei tûrah an fimkhur a, an ei tûr rêng rêng an tem hmasa phawt ṭhin niin an sawi.

Thulâkna : “Thil mak bawm” Lehkhabu ziaktu – “C.H. Thangkhuma”

 

LEAVE A REPLY

Please enter your comment!
Please enter your name here