KA LAIZAWNNU THIL TAWH HREHAWM CHU

                Ka unaunu Precious-i’n kan in a chhuahsan hnu chuan ka khua a har thei êm êm a, kei aiin kum 5-in a upa a, ka ngaisang a, ka zah êm êm ṭhin bawk. Ṭha taka pawl 12 a pass hnuin Nairobi-ah nurse zir tûrin min kalsan ta a ni.

                A naupan lai aṭangin nurse nih chu a châk hle ṭhin a, kan véng chhunga naupang, keimah ang rual ho chu min ko khâwm a, nurse lemah ṭangin, dam lo angin lem min chantir thung a, min enkawl fiam vêl ṭhin. Kan bán te, kan kuk pilh te chu puan them têin a tuam a, hmawlhte hmangte khan min chàr sak vêl ṭhin, kan ká min àn tir a, kan hrawkte kha a check vêl ṭhin tih te pawh ka la hre reng mai.

                Narobi-ah chuan ka ú chu a hlim hle a, chawlh hmangin a rawn haw ṭhin a, chûng hunah te chuan kan ṭhenawm khaw véng zawng zawngin an lo làwm a, ‘Precious, zi zo vat rawh, kan khua hian nurse thar kan duh belh viau tawh a nia,’ ti tein an lo fuih phûr ve ṭhin. Mipa ho te pawh chuan ka ú chu an ngaisáng hlawm hle a, ‘I hman hun hunah min check ve hrâm teh a,’ ti tein an fiam a, ka ú chuan a nuihpui nasa thei hle a ni.

                Mahse, engemaw chen a zir hnu chuan chawlh hmangin a rawn haw ta tlat lo mai. Chutiang a nih tâk avâng chuan kan ngaih a ṭha thei tawh lo va, a chanchin tak ngial pawh engmah hriat tûr a awm bawk si lo. Ni dangah chuan a lo haw loh pawhin thla tin lehkhathawn a rawn ziak ziah ṭhin a, kan inbe pawp ve reng ṭhin a ni si a. Tichuan, kum a lo tâwp a, Krismas chawlh hmang tûr pawh chuan a rawn haw ta lo va, ka nu leh pa te chu an mangang ṭah ta der mai. www.zolinks.com

                Ka pa chuan ka ú ngaihven tûra Nairobi lama kal chu a tum ta a, a kianga kal ve chu ka ngên a, a tir chuan a phal lo viau nâin, ka ngen nasat êm avângin a phal ve ta nge nge a ni.

                Nairobi khaw chhung kan han thleng chu thingtláng nula tih takah hmuhnawm ka ti hle mai. Zanah kan lût a, khua chu a êng ut mai si a, ka tan chuan hmuhnawm tham vek an ni. Ka pa hnênah chuan zawhna chi tinreng ka zâwt a, kan thil hmuh apiang chu eng nge a nih tiin ka pa chu ka zâwt zêl ringawt mai a. Mahse, ka pa erawh a rilru a hah vâng leh a mangan rûk êm avângin ka zawhna zawng zawng chu a ngaithla lêm lo va, min chhang vek lem lo.

                Khua kan luh rual chuan ka ú training-na damdawi in chu kan pan ding nghâl vang vang a. Chulai hmun chu kum hnih kal taa ka pain ka ú a hruaina hmun ngei chu a ni. Damdaw ina nurse training ho hàw tûr chu kan va tâwk ta hlauh va, ka pa chuan Precious Kanye-i kan zawn hmuh theih dan tûr chu a zâwt ta nghal phawng mai.

                Nurse zirlai te chuan mak tih hmel takin an lo en lêt hú hlawm a, an zinga pakhat chuan Precious-i chu school chhuahsanin UK lamah a kal daih tawh thu a rawn sawi chhuak ta hlawl mai. Ka pa chu a phu zawk a, a petek ta nawk nawk mai. Kan thu hriat chuan a ṭhawng hle tih chu hai chi ziazáng a ni lo. A bul hnaia ṭhutthlengah chuan kan ṭhuttir a, nurse traning lai te hnenah chuan an thil hriat dan zawng zawng min hrilh vek tûrin ka ngên ta tawp mai. Thla thum kal ta khan UK-a university a hruai theitu tûr leh sum tum sak vek inhuam mi pakhat a tawng tih chauh chu an sawi chhâwn theih awm chhun a ni si. Chuta chin chu anni pawhin a chanchin an hre zui ta miah lo a lo ni a.

                Ka pa han ziaawm leh deuh hnu chuan Nursing School Director office lamah kan kal leh nghal a. Ani pawh chuan nurse zirlai hovin min hrilh ang bawk chu min lo hrilh ve leh a, kan hriatpui vek emaw a lo ti nghe nghe a ni.

                An director chu a fel hle a, an canteen-ah a thlàwnin zanriah tuihnai tak min buatsaih sak a, chumi hnu chuan kan thlen in tûr lam pan chuan kan haw ta a ni.  www.zolinks.com

                A tûkah chuan beidawng ru tak chungin police station lam chu kan pan leh ta. Police officer hnenah chuan ka ú chanchin leh thil fel lo a awm nia kan rin thu te chu kan hrilh a. Police officer chuan ka ú chu ram páwna a kal a rin loh thu leh a rai palh ang a, in lam a biak pawh ngam tawh loh avângin khawilaiah emaw a biru a nih a rin thuin min chhang a. Eng pawh chu ni se, an lo chhui chian tûr thu leh kar khat hnua chanchin rawn ngaihven leh tûrin min ti ta a. Chutiang a nih tâk siah chuan kan khaw lam pan chuan kan haw leh ta rih a ni.

                In kan thleng a, ka ú chanchin chu ka nu kan hrilh lo thei si lo, a áwm chumin a ṭap ta hawm hawm mai a. Kan ṭhenawm hnaia mi te pawh chu an lo kal khâwm a, ka nu ṭah chhan an han hriat chuan, ka ú chu a thi ta emaw tih mai tûrin an ṭahpui ta ruih ruih hlawm mai a, rei lo têah ka ú chu thi than tein a thang ta hial nghe nghe a ni.

                Chuta ṭang chuan lusûn chhungkua ang maiin kan nguai zo ta. Ka nu chu a fanu ngaiin a ṭap reng a, ka pa lah rilru nat vângin a ṭawng ngai mang lo va, Lo ah kalin hna a thawk bawrh bawrh ringawt a. Ka nau nên chuan ka nu leh pa te chu theih tâwpin hnem kan tum a, ṭhenawm khaw vengten ei leh in tûr leh mei tuah tûr thing te min rawn lâk khâwm sak bawk a, an ti lawmawm khawp mai. Ka nu lah lungchhiat vângin a ṭap bang hlei thei bawk si lo.

                Kar khat liam leh hnu chuan National police station-ah chanchin ngaichang tûrin kan va zin leh a, a hmaa min lo be tu officer bawk kha kan va hmu leh a. Ani chuan hma a la mêk zêl tih thu min hrilh a, ka ú thlalâk chu rawn thawn tûr leh thu thar lo ngaichang leh rih tûrin min thlah liam leh ta mai a ni. Kan bei a dawng zual a, mahse, police officer thu ang chuan ka ú thlalâk chu kan thawn ta tho va.

                Kar thum a liam leh hnu chuan kan venga police officer pakhatin min rawn tlawh ta nawlh mai. Ani chuan Nairobi police hnen aṭangin thu a dawng tih a sawi a. Ka ú Precious-i chu ram páwn lamah a kal ngei nia rin theihna tûr finfiahna an nei tih an sawi a. Airport-a security thlalâk ah ka ú chu a lang niin an sawi a ni.  www.zolinks.com

                Security thlalâka a lan dan chuan Precious-i chuan endikna pal tlangin, mipa pakhat nên an kal dûn a. London police lam biak pawh a, chu lam airport-ah chuan an ṭum ngei em tih an lo zawh fiah tûr thu min rawn hrilh a ni. Thla khat a liam leh a, ka ú chu him taka a awm theih nân tih chu kan ṭawngṭai thupui ber a ni ta ringawt mai.

                Tichuan, police te chuan thu thar an rawn nei leh ta. Ka ú chu Nairobi airport-a a mipa kal pui nên khan Heathrow airport, London-ah hmuh dun an ni leh ta ngei mai.

                Ka ú chuan engatinge keini min hrilh lovin ram dangah a kal daih mai le? Chhungkaw inpawh tak leh engkim inhrilh a, inngaichang zêl chi kan ni si a. Mahse, tûnah chuan min rawn be leh duh ang em? Kan inhmu leh thei ang em? tih chu nitina kan rilrua zawhna awm a ni ta. Vânneihthlâk takin thu thar ka hre ta hlauh mai.

                Kan sikul kal haw lam chu kawng laklawhah jeep pakhat hian min rawn ûm pha a, ka bulah chuan an rawn ding a, sâp nu pakhat hi a rawn chhuk a, ka hming te min rawn zâwt a, ka hrilh hnu chuan envelope min pe a, ka han hawng a, a chhunga lehkha ka han en chuan ka thin phu chu a rang nghal kher mai. Ka ú Precious-i hawrawp ngei a ni tih ka hre thei nghal mai a ni.

                Lehkhathawnah chuan Nairobi-a Hostel pakhatah amah hmu tûra kal tûrin min ti a, ka nu leh pa te chu engmah hrilh rih lo tûrin min ti bawk a. Sâp nu chuan a tûkah min rawn lam tûrin a lo kal leh ang tiin min thlah ta a. Ka nu leh pa te hnenah chuan engmah chu ka sawi rih lo ta ngei a, a tûkah chuan sikul kal tûr angin ka chhuak a, kawng laklawhah sâp nu chuan jeep hmang chuan min rawn lam ta a. Khawpui lamah chuan min hruai a, hmun zau tak, gate lian tak awmnaah kan lût a, a chhungah chuan building a lo awm a, chu chu ka ú-in hostel a rawn sawi chu a ni.  www.zolinks.com

                Sâp nu, a hming Mary chuan room pakhatah min hruai hrang nghal a, chu room-ah chuan hmeichhe pakhat hi khumah a lo mu bám a, ka han enchian nâk chuan ka ú Precious-i lo ni rengin! A chêr chhe hle a, dam lohna nasa tak nei ang maiin a dawldáng hle bawk a, a chauh hmel hle bawk a ni. Ka ú chu mi hlim thei leh mi phawk tak a ni a, mahse, chutiang chu a hmelah leh a awmdanah chuan hmuh tûr a awm tawh lo reng reng.

                Mittui tla zawih zawih chungin kan inkuah a, kan inkuah bang hlei thei lo. Tichuan, a chunga thil theln dan hrehawm tak leh vanduaithlâk tak chu min hrilh ta. (Precious-i sawi angin) : “Nursing ka zirna hmunah chuan ka kal tluang hle a, test, exam leh practical-ah te pawh ka ti ṭha thei lutuk. Ka ṭhiante leh kan zirtirtute pawhin min beisei sáng a, thiam chak min ti thei hle bawk. Ni khat chu canteen-a ka chawlh laiin pa pakhat hian min rawn pan a, min rawn titipui ta a. Ka nihna te, zirlai zinga a thiam thei ber pawl ka nih thu a lo hriat thu te leh ram páwna zirna ṭha zâwk leh changkâng zâwka kal ka duh leh duh loh min rawn zâwt a. A sawi dan chuan London-a medical school ṭha deuh pakhata zir tûr mi fel tak tak a zawng khâwm a ti a.

                A tir chuan ka han hnial ve deuh va, mahse, min thlêm thiam khawp mai. Ka zir zawhah ka thawk nghal ang a, ka chhungte hnenah pawisa tam tak, helai hmuna ka hlawh aia tam ka hlawh ang a, ka rawn thawn thei dawn che u angin a sawi a. Tin, midang hnena hrilh lo tûr leh min thik ang a, buaina a awm palh ang tiin min hrilh bawk a. A tâwpah chuan ka remti ta a ni.

                Tuma hriat lem lohva kal tûrin min ti a, chuvâng chuan, in lam pawh ka rawn hrilh ta lo che u a. Tichuan, chutia kan inbiak aṭanga ni rei lo têah chu pa chu zuiin, UK lama kal tûrin kan thlâwk chhuak ta a ni. Ka hlauhthâwn rualin, thil a kal sual ang tih ngaihna ka hre lo va, ka phûr ru ang reng viau zâwk nghe nghe a ni.

                UK kan thlen hnu chuan kawng nuam takah motor nalh takin min hruai a, in lian tak pakhat kan thleng ta a, a kawtah te chuan motor nalh tak tak a inhung fur bawk a. A chhung kan luh chuan nu pakhatin min lo khual chhawn nghal a, room pakhatah min hruai a, chutah chuan hahchâwl tûrin min ti a, rei lo têah a lo kal leh ang tiin min chhuahsan ta a.

                Chumi hnu chuan Nairobi aṭanga min hruaitu mipa chu a rawn lût a, khuamah chuan min nawr bet a, min pawngsual ta hmiah hmiah mai. Nasa takin ka au va, ka ṭap vak bawk a, mahse, min nuih ringawt a nih chu. Páwn lam a ṭangin tumah min rawn puih tum pawh an awm lo. A tih tûr a tih zawh hnu chuan inbual fai tûrin min ti a, min chhuahsan ta a, páwn lam aṭangin ka room kawngka chu a kalh zui ta hmak bawk a ni. Chu chu ka hrehawm in ṭanna bul chu a ni. Zan tin maiin pawngsual ka ni ta ziah a, chaw ei tûr leh zun ram thiar tûr chauhvin min chhuahtir ṭhin. Ka chhungte ho ka rawn ngaihtuah che u a, ka lo mâwl êm mai tiin zantin ka ṭap reng ringawt mai a ni,”

                “Engtin nge i lo chhuah theih a? Engtin nge Kenya-ah hian i lo lêt leh theih?” tiin ka zâwt a.  www.zolinks.com

                “Zan khat chu mipa pakhat, zan dang a mi te aia polite leh fel deuh mai hi min dâwr tûrin a lo kal a, a fel êm avâng chuan min ṭanpui tûrin ka ngên ta tawp mai a. Hren beh ka nih dan te leh bum ka nih avânga chulai hmuna awm ka nih dan te chu ka hrilh ta vek a, ani pawhin mak a tih hmel khawp mai. Mahni duh thu ngeia inzuar emaw min ti a, ngawi renga awm rih tûr leh puitu tûr a rawn tirh tûr thu min hrilh ta a ni.

                A tûkah chuan ka tànna inah chuan thâwm a tam ta hle mai a, bang chùm vak vak thâwm leh mihring au chiam chiam thâwm te chu ka hre ta a. Min kalh hnanna room chu police pakhatin a rawn hawng ta hlawl a, páwnah min hruai chhuak a, a car-in police station lamah min hruai zui ta a ni.

                Police station-ah chuan thu tlem a zawng min zâwt a, ka thusawi te chu an chhinchhiah a, chumi hnu chuan hostel pakhatah min hruai ta a, chutah chuan ka dinhmun anga ding hmeichhe tlêm a zawng an lo awm ve bawk a. Kar khat hnuah Nairobi lamah thlawhnain min rawn thawn haw ta a, hmeichhe ṭhenkhatin min lo hmuak a, helai hmunah hian min hruai ta a ni.

                He hmun a mi te hian min duat hle a, damdawi hmangin min enkawl a, counselling min neih pui reng bawk a. Mahse, ka la chak tâwk chiah lo va, mumang hrehawm tak tak ka la nei fo bawk a ni.”

                In lama haw chu a duh rualin, a la ngam lo va, a zah thu min hrilh a. A chunga thil thlengte chu ka nu leh pain hria se engtin nge an ngaih ang tih chu a rilrua lian ber a la ni. Hruai hàw nghal mai chu ka duh a, mahse, a duh dan ngaih pawimawh sak chu ṭha ka ti ta zâwk a.

                Pi Mary chuan jeep hmangin kan in lamah chuan min thlah hàw leh a, In ka thlen chuan làwm avângin ka mittui ka dang zo lo. Ka nu leh pa te chuan sikul ka bàn tlài êm avângin min lo ngaihtuah hman hle tih an lo sawi a. Mahse, an chân loh lamah ka ú chanchin chu ka hrilh ta zâwk a ni. Ka nu leh pa te chu an lâwm hle mai a, a zan a zan chuan ka ú hruai tûra tei chhuah mai chu an duh rum rum a. Mahse, ka ú duh dan te chu ka han hrilhfiah a, anni erawhin an ngaithla lem lo. A tûkah an pahnihin Nairobi lamah chuan an kal a, ka ú chu va hruai chhuah an tum ta. Mahse, dam ṭha tûra hun a la duh avângin, ka cousin te véngah a awm rih ang tiin thu kan titlu tláng ta a ni.

                Chumi zàn chuan ka nu chu lâwm avângin a zai a, a lám a, Pathian a fak a, a hlim lutuk chu a ṭap a, a zai tàwp thei lo. Pathianin a fanu chu him taka a lo hruai kir leh avângin a lawm lutuk a, tunge dem thei ang le…

www.zolinks.com

Thu lâkna : “D Zun”

LEAVE A REPLY

Please enter your comment!
Please enter your name here