JOHN NAPIER (1550-1617)

                Chhiarkawp thiam hi sumdâwnnaah te, indonaah te, science leh engineering zirna péng hrang hrangah te a ṭangkai hlê. Tûnlai hunah pawh chhiarkawp thiam chu mi vannei tak a ni. John Napier-a hian chhiarkawp harsa leh khirhkhân tak takte awlsam zâwka chhût chhuah dàn a hmu chhuak tlat mai! He a thil hmuh chhuah hmang hian puntir leh sem te chu awlsam zâwkin an lo chhût chhuak thei ta a ni. He number chhût dàn thar hi ‘Logarithm’ a ni.

                John Napier-a hi Scotland rama Edinburgh khaw bul lawk, Merchiston Castle-ah kum 1550 khán a lo piang a, a pian lái hian a pa chu kum 16 mi lek a ni. Kum 13 mî a nihin St. Andrews University ah a lût dêr tawh a, mahse rei pawh zir lovin, a zir zawh hmain University hi a chhuahsan a. A hun hmasa lama a chanchin hi hriat tùr a tam lo hlê nain, ram dang tlawhin a zin kual nasa hlê tih erawh chu a hriat theih a. Hetia a zin kual hnu hian kum 1571-ah an in lamah haw lehin, Merchiston-ah a hun pum chu a hmang ta niin a lang. Napier-a hian kum 1572 khan nupui a nei a, amaherawhchu a nupui hian kum 1579 thleng chauh a dampui a, a nupui thih hnu hian nupui dang a nei leh a ni âwm e. www.zolinks.com

                Napier-a hian kum 1593 khán Rome Kohhran chungcháng lehkhabu a ziak a. He a lehkhabu hian Pope kaihhruai kohhran chuan khawvêl hi kum 1688 leh 1700 inkár chhúngin a ṭhen darh vek dáwn niin a sawi hial a, chu chuan inhnialna a thlen nasa hlê. Mi beng verh záwng tak a nih avângin he lehkhabu hi vawi sawmhnih leh pakhat lái chhut a ni a, Napier-a hian a dam laiin vawi sawm an chhut thleng a hmu hman a ni.

                He sakhaw lam lehkhabu a chhuah hnu hian Napier-a hian kawng dangah rilru séngin, indona hmanrua ṭangkai tak tak a hmu chhuak nual a. ‘Darthlatlang alh thei’ an tih mai pawh chi hnih lai a siam chhuak a, sakawr tawlailir, thir hmanga siam, silai kah tlang theih loh pawh a siam chhuak bawk.

                Napier-a hian a hun tam zâwk chu chhiarkawp leh finna ril zâwk zir nán a hmang ber ṭhin. Heti khawpa chhiarkawp lama tui leh mi ril a nih avâng hian chhiarkawp leh Napier-a hming hi sawi dun a ni zui ta zêl a ni. Chhiarkawp chhûtna hmanraw dang pawimawh tak pakhat ‘Napier Rod’ pawh a siam chhuak leh bawk a. He hmanrua hi belh, paih leh square root chhût awlsam nán hman a ni a, a ṭangkai hlê.  www.zolinks.com
                Napier-a hian thil tam tak siam chhuak mah se, heng zawng zawng zingah hian ‘Logarithm’ hi ropui ber leh a lârna ber niin a lang. Logarithm chungchang hi kum 1593 khan a buaipui ṭan a, ti chuan zawi zawiin root, quotient leh a dangte zawn dan awlsam zâwk chu a duang chhuak zel a, a tâwpah ‘Logarithm table’ chu a siam chhuak ta hlawl mai a ni. Logarithm hmang hian puntír harsa tak takte chu belhna anga lantír a ni a, semna chu paihna anga lantir a ni thung. Number hlutna (power) zât chu logarithm table hmangin number pahnih belh emaw paih chhuak chu awlsam takin a hmuh chhuah zung zung theih a ni. Antilogartithm table hmangin hêng number lo chhuah dàn hi a chhût lêt theih bawk.  www.zolinks.com

                Kháwl thluak nei tia kan sawi ṭhin, computer hian thil chhûtna atána logarithm hman ṭùlna titlêm tawh mah se logarithm hi a la pawimawhin a la hlu reng a, number rang taka chhût chhuah zung zung theihna, man tláwm leh rintlâk ber pakhat chu a la ni ta fan a ni. He mi ril, chhiarkawp lama hmahruaitu ropui tak hi April 4, 1617 khán Merchiston-ah mual a lo liam ve ta a. Tûnah khawvêlah awm tawh lo mah se, a thil hmuh chuah ‘Logarithm’ avâng hian khawvêlin a theihnghilh tawh lo vang.  www.zolinks.com

LEAVE A REPLY

Please enter your comment!
Please enter your name here