JK ROWLING ZIN KÁWNG 

                Dàwi lam chanchin tàrlanna lehkhabu leh film lar tak mai Harry Potter hi kan hre ṭheuh awm e. A film hmuhnawmzia leh a lehkhabu ngaihnawm zia hi a en leh chhiar tawhte chuan an hria ang. Mahse Harry Potter a lo pian chhuah theih nána he lehkhabu ziaktu JK Rowling-i zin kawng leh harsatna paltlangte erawh hi chu hria an tam kher lo vang.

               JK Rowling hi England ram khawpui pakhatah kum 1965 July 31 khan a lo piang a. Rowling-i hian a naupan laiin harsatna tam tak a tâwk a. Chu’ng a harsatna tawh hrang hrang leh nun hman chhoh dante chu a thawnthu ziah Harry Potter-ah hian character hrang hrangin a lan chhuah tir ṭhin. A naupan lai hian a nun a hlim lo hle ṭhin niin an sawi a. A nu a hrisel lo hle a, a pa nen an inmil lo hle bawk a. Wyedean hmunah school leh college a kal ṭhin a. Hetah hian a nu chu Science Department-ah technician-in a thawk nghe nghe.

               Kum 1982-ah Oxford University-a lût turin entrance a bei a, a tling lo. University of Exeter-ah French leh Classic-ah BA a zir a. BA a zir zawh hnuah Amnesty International-ah a thawk a. Amnesty International-a a thawh hnu hian a bialpa nen Manchester-a pém turin an inbuatsaih a. Kum 1990-ah Manchester aṭanga London pan tur rél chu dárkár li laiin an tikhawtlai a. Hetia rél khawtlai an nghah chhung hian khawvel hriata amah pho chhuaktu tur naupang pakhat dàwi lam zirna school-a a luh dan chanchin chu a ngaihtuah chhuak ṭan ta a. Tichuan Harry Potter thawnthu chu a bul aṭanga inṭanin a indawt dan tur fel tak nen a thinlungah a lo lût ta zawih zawih mai niin a sawi nghe nghe. Harry Potter a ngaihtuah chhuah dan chu ‘ti hian amah ngeiin a sawi’. www.zolinks.com

               “Keimahin London panin rél tâwt takah ka haw a. Ka ngaihtuahna ah Harry Potter chu a lo lût ta a. Kum 6 mi ka nih lai aṭang tawhin thil hi ka lo ziak ve fo tawh ṭhin a, mahse chumi ṭum ang êm êma ruahmanna mumal chu ka la dawng ngai lo. Amaherawhchu chutih lai chuan pen ka lo ken theihnghilh tlat pek a. Mi dang hnena pen hawh han dil kha ka hreh bawk si a. Tichuan darkar 4 chhung ka chuanna rél an tihkhawtlai chhung chu ka ṭhu a. Ka rilrua thawnthu ruangám lo lang chu ka ngaihtuah zui ta char char a. Chumi tlaiah chuan Harry Potter bu hmasa ber ‘Philosopher’s Stone’ chu ka ziak ṭan char char a ni”.

               Rowling-i chuan Clapham Junction a thlen veleh a thil lo ngaihtuah tawh chu a ziak chhuak nghâl a. Chumi kum December thla chuan Rowling-i nu chu a boral a. A nu boralna chuan a Harry Potter ziah lai pawh chu a nghawng nasa hle a, chu vang chuan Harry Potter bu hmasa berah pawh a nu boral ta a tuarzia lantir nán Harry-an a chan nasat zia a ziak lang nghe nghe.

               Hemi hnu hian Portugal rama Porto khuaah English zirtirtu hna a thawk a. Zan lamah a zirtir a, chhunah a lehkhabu ziah chu a chhunzawm leh char char ṭhin. He hmuna a awm lai hian TV journalist Jorge Arantes nen intawngin 1992 October 16-ah an innei a. Fa pakhat an nei hman tihin thla 13 lek an inneih hnuah an inṭhen leh a. 1993 December- ah Rowling-i chu a fanu nen Scotland rama Edinburgh (ednbra) hmunah an pém a. Hetih lai hian Rowling-i hian a suitcase-ah Harry Potter chapter 3 a ziah zawh tawh chu a keng tel bawk.  www.zolinks.com

               Graduate a nih aṭangin kum sarih a vei tawh a. A eizawnna leh hun hmanah a vanduai êm avangin Rowling-i pawh a beidawng hle tawh a. “Ka hriat tawhah chuan mi hlawhchham ber ka ni,” a inti hial. Pasal a nei fuh thei lo va, hna thawh a nei lo va, a fanu a chhawm tel bawk a. Hetih hun lai hian Rowling-i’n rilru natna nasa tak a vei a, depression avangin intihhlum hial pawh a tum nghe nghe. A rilrua ngaihtuahna lian tak awm chu beidawnna kárah pawh puitlin tumin a bei ṭang ṭang a, hmun remcháng a hmuhna apiangah a thawhthu chu a ziak chhunzawm mai ṭhin. Dàwr hmunah te a ziak deuh ber a. Nicolson’s Cafe-ah te, The Elephant House hmunah te a ziak a. A fanu Jessica chu a bulah a awm chawt ṭhin avangin Jessica-i a mut theihna hmun remcháng a hmuhna apiangah Harry Potter chu a ziah zawm ṭhin.

               Kum 1995-ah Harry Potter lehkhabu hmasa ber Harry Potter and the Philosopher’s Stone tih chu zuak zovin typewriter-in a chhu chhuak a. Lehkhabu chhuahtu 12-te hnenah chhuahtir tumin a zâwt kual a, tumahin an lo chhuahsak duh lo. A kum lehah London-a publishing house pakhat Bloomsbury-a an editor Barry Cunningham chuan Dollar 1500 pe lawkin an chhuahsak theih tur thu a hrilh a. Bloomsbury (blúmzbri)-in chhuaksak an tumna chhan pawh a lehkhabu ṭha an tih vang nilovin lehkhabu original copy chu Bloomsbury (blúmzbri) neitu fanu Alice Newton-i chu a pain a chhuartir chhin a, chu naupang chuan ngaihnawm a tih êm vang mai a ni!

               Kum 1997 June thlaah Bloomsbury chuan Harry Potter lehkhabu hmasa ber chu copy 1000 an tichhuak ta a, chuta ṭanga copy 500 zet chu library hrang hrangah an pe darh a. Thla nga hnuah chu lehkhabu chuan Nestle Smarties Book Prize-a dawng nghâl a. Kum 1998-ah United States-ah chu lehkhabu chhu thei tur zawnna an neihah chuan Scholastic Inc. chuan Dollar 105,000-in an chháng a. Hemi thu hriat tirh chuan Rowling-i chu a lawm lutuk a, a thi lo chauh nghe nghe. (Tunah chuan chhut hmasak ber hi bu khat hlutna pawh dollar 16,000 aṭanga 25,000 vêl a ni tawh!)

               Kum 1998 July thlaah ‘Harry Potter and the Chamber of Secrets’ tihchhuah a ni a, kum 1999 December thlaah ‘Harry Potter and the Prisoner of Akzaban’ tihchhuah leh a ni a. Lehkhabu kum záwna a tihchhuah te chuan Smarties Prize Award an dawng vek a, Rowling-i chu a záwna kum thum award dawng thei awm chhun a nih phah nghe nghe. Kum 2000 Jully thlaah a lehkkhabu palina ‘Harry Potter and the Goblet of Fire’ chu US leh UK-ah arualin tihchhuah a ni a. Ram pahnihah lehkhabu hralh record an siam ve ve a, UK-ah chuan an release aṭanga dárkár 48 chhungin copy maktaduai 3 an hralh! Lehkhabu hrah tawh zawng zawng record an khûm vek a ni. A hnu kum 3-naah a lehkhabu pangana ‘Harry Potter and the Order of the Phoenix’ chu a release leh a. Hei pawh h an hralh hnem hle. www.zolinks.com

               A lehkhabu parukna,’Harry Potter and the Half Blood Prince’ chu kum 2005 July 16-ah an release a. Hemi ṭum pawh hian a hmaa record awm sâ zawng zawng chu khum leh a, an release aṭanga dárlár 24 chhungin copy maktaduai 9 an hralh hman a ni. Kum 2009 July ni 21-ah Harry Potter lehkhabu hnuhnung ber ‘Harry Potter and the Deadly Hallows’ chu release leh a ni a. Hei hian a hmaa record chu khûm lehin khawvela lehkhabu hralh chak ber record a siam a. US leh UK-ah release niin copy maktaduai 11 an hralh hman. Harry Potter lehkhabute hi khawvela lehkhabu hralh tam ber record siamtu a nih mai bâkah he lehkhabu leh a chhunga thu ṭhenkhatte hi ṭawng hrang hrang 65-a lehlin an ni tawh bawk a ni.

LEAVE A REPLY

Please enter your comment!
Please enter your name here