AWMDAN MÁWI – Damlo Tlawh Hunin (Damdawi In Leh Mimal Inah)

A. DAMDAWI INAH

           1. Mizote hi, inah pawh, damdawi inah pawh damloh laia intlawh tel tel kan ching a, a ṭhain, a lawmawm khawp mai. Mahse, damlo natakte an chanchin, an chhúngte zâwt mai lova, anmahni biak kher kan tum ṭhin hi, a ṭha lêm lo a ni.

           2. Damdawiina damlo kan kan hian, a tlángpuiin, ṭum khatah tlawhtu pahnih zêl chauh an phalsak ṭhin a. Mahse, Mizote hian, pahnih aia tam, Nurse emaw ten min hau hma loh chuan, awm sup sup kan chíng hle a, boruak ṭhate kan hippui a, a ṭhat loh viau bâkah kan hnam a la chankân lohna lantirtu tak a ni bawk.

           3. Damlo tlawh hun hi damdawiin zawng zawng ah siam vek a ni a. Hêng hunte pawisa vak lova, mahni milenna chhuang deuh ni âwm taka, a hun lova kal hi chin loh tawp atân a ṭha. Damlo chaklote, an dama an chak thuai theih nan, mut hunbite an siamsak a, muhil thei lova va siam hi, kan tlawhate tán khán ṭha lo tak a ni.

           4. Damdawiina, Doctor leh Nurse ten damlo an tlawh kual lai leh damlo tlawh hun a inrual palh ṭum hian, lo chhuak rih tura min tirh ngai lova, lo inthiarfihlim thuai thuai hi, mifel tih dan a ni. www.zolinks.com

           5. Damdawiina damlo damloh dân an ziakna hi, mi tam takin kan hriatthiam ve loh laiin, mi ṭhenkhatte chuan an hrethiam a. Hrethiam mahse chu damdawiina thawkte tân lo chuan, en ve phal a ni lova, lo en ve hi kan tih tùr a ni lo.

           6. Chubâkah, an damdawi chawte sawisêl chin hi a ṭha lo bawk. Kan sawisêlna kha an hriat leh si phei chuan, damlo tán thil ṭhalo zâwk a thleng thei a ni. Doctor te, mihringte rêng rêng hian sawisêlna hi kan haw viau a ni.

           7. Damlo kan kan laiin, an inthiarna hi a theih hrám chuan, hmansak tum loh a ṭha, a mawi lova, a hrisêl lo bawk.

           8. Kan damlo tlawh kha, midangte nena pindankhata muho an nih chuan, leh kan damlo kana kha na changkâng deuh tawh pawh nise, midangte kha natak an lo nh theih avângin, ṭawngte, ṭawngṭainate zawi deuh hleka neih ṭhin a ṭha.

           9. Damlo natna rêng rêng, a lungngaihthlâk záwnga sawipui ai chuan, a ziaawm záwnga sawipui hi chin ṭheuh atan a ṭha bawk.

           10. A tlángpuiin, damlo kan tlawh hian, reilo deuh, minutes sâwm emaw chauh ni ṭhin se a ṭha. Anmahni ṭanpuitu leh awmpuitu kan nih erawh chuan thudang nise.  www.zolinks.com

           11. A tlángpuiin, upa lam nih hian, hrisêlnate a lo tlahniam a, ṭawngring tak ngaihthlâk hi a hahthlâk duh a. Chuvângin, kan damlo kan kha upa lam an nih tawh chuan ṭawng rin loh deuh a ṭha fo.

           12. Damlo kan kanin, ṭawng ṭawng peih tawh leh chak tawh deuhte kan kanin, an kianga damlo na zâwkte mitkhamna leh nin thehi záwng takin awm loh hrâm hrâm tum a ṭha.

           13. Damlo damdawiina kan kan hian, thilpêkte kan keng ṭhin a, a ṭha khawp mai. Mizote hi a tlángpuia kan la retheih avâng hian an mamawh tak kan hriat loh bawk chuan, pawisa hi engkima hman theih a ni a, a ṭha ber em ni aw a tih theih. Sâp (English) ho tihdân angin, a thei leh neizote chuan, card te, pangpárte, inbualna powder leh hmanruate, sahbawnte, towelte, lehkhabu ngaihnawm te, leh thil nepnawi (Stationeries) te in pêk atan chuan an ṭha khawp bawk mai.

           14. Damdawiina mi kan va kan hian, bathlâr vela ring tak taka ṭawng leh nuihte hi a máwi lova, midang a tibuai a, chin loh atan a ṭha.

           15. A tlángpuiin damdawi inah hian, naupang kum 12 hnuailam hi kal tir phal an ni lo ṭhin a. Mahse mi ṭhenkhat naupang hruai bâkah, bathlâr vela lo ninhleite hi an awm zauh zauh va, a fel lo hlê bawk a ni.

           16. Damdawiinah emaw, doctor pindanah emaw, doctor kan râwnin, damlo chu hruai ngei tur a ni. Mi ṭhenkhat ten damlo hruai lova, an awmdân sawia râwn mai ching hi kan awm zeuh zeuh a, hei hi a diklo bawk a ni.

           17. Tunlai hian Cancer natna te a tam ta a. Mi tam takin, kan chhúngte cancer natna an neih pawhin, kan zêpsak ṭhin a, hei hi a ṭha lo hle in a lang. Taksa thi tho tho tur hmangaiha, dâwt sawia an natna dik tak zêpsak ai chuan, dik tak hrilh a, Thlarau chhandama an awm theih nana, piangthar an lo la nih loh palh pawha, inbuatsaihna hun an neih theih nana, thu dik tak sawia hrilh zêl a ṭhat zâwk hmel a ni. Kan Lalpa hian Thlarau chhandama kan awm theih hi a tum ber a ni bawk si a, taksa malsàwmna hi chu a pahnihna chauh a ni zâwk si a.

B. MIMAL INAH  www.zolinks.com

           18. Damlo mimal inah, na deuh leh na lo deuh pawh kan kanin, anmahni remtihna la hmasa lova, damlo mutna pindan luh nghâl mai hi a máwi lova, a ṭha lo bawk. Remchàn lohna eng eng emaw a awm thei fo a ni.

           19. An boruak hip ve turte va hippuia damlo mutna pindana va ṭhut ṭeuh hi a ṭha lo bawk. Meizialte va zûk phei hi chu ṭha lo tak a ni.

           20. An ei leh in châkzáwng tur, an ei leh in theih loh tùr si, va sawi vakte a hlauhawm a, ti ti fimkhur a ṭul bawk.

           21. Damlo na deuh chu hmuh nge ṭha ang hmuh loh tiin an chhúngte ràwn hmasak a ṭha. An chhúngte hnên aṭanga an chanchin zawha hriat mai hi, hun tam takah a tâwk chauh a ni fo.

           22. Damlo na changkâng deuh tawhte chu, anmahni kàwm a, an nat dante sawi tir a, ngaihthlâk sak hi, duh duha an ṭawng theih tawh chuan a ṭha hle. Kan damlo min rawn kan ni ve si, ti ti dang an sawi daih a, kan nat dân pawh hre mumal lova an haw leh daih hi chu, a làwmawm nêp deuh a ni.

           23. Damlo kan kan hian, a bik takin thingtlángah te, rei tak tak kan léng ṭhin hi a ṭha lo bawk. Zàn laklawha thawh a ngaih chángte a lo awm a, hma deuha an mùt theih ṭhin kha a ṭha a ni.

           24. A bik takin, damlo tlawh hi, kohhran hruaitute, upate rawngbawktute, zirtirtute tán hna pawimawh leh ṭul tak a ni. A thei tan chuan va en ngawt lova ṭawngṭaina va neihpui kher hi a ṭha bawk. Damlo tana a làwmawmna leh hlimna bâkah. mahni rawngbawl zêlna atan ṭanpuitu ṭha tak a ni bawk. Kan dam loh laia hmangaih taka min kan tute Pathian thusawi chu, kan pawh min kan duh lote thusawi ai chuan rilruah a lût duh zâwk.

LEAVE A REPLY

Please enter your comment!
Please enter your name here