ANTI-SEPTIC HMUCHHUAKTU JOSEPH LISTER (1827-1912)

                Taksaah hliam a lo awmin a pûn fo ṭhin a, a lo pùn nasat hlê phei chuan thihna hial a thlen thei a ni. Hliam a lo pùn ṭhin nachhan chu hliam aṭang khán thisenah mit lâwnga hmuh tham loh natna hrik (bacteria) a luh ṭhin vâng a ni. Kum zabi 19-na tir lamah te kha chuan daktawrte pawhin hliam a pùn loh nân natna hrik lakah vènhim a ngai a ni, tih hi an lo hre bîk lo va, chuvâng chuan mi tam takin an thih phah a, daktawrin an zai tam tak chuan an thih phah ṭhin a ni. Joseph Lister-a hian hliam hi natna hrik laka kan vêna, kan enkawl uluk loh chuan a pún thei a ni tih rawn hmu chhuakin, amah hi daktawr, mi zai thiam zinga hliam pún tùr danna damdawi (anti-septic) hmang hmasa ber a lo ni ta a ni.

                Lister-a hi kum 1827 khán England rama Upton khuaah a lo piang a. A nu leh pa te chu Kristian pawl pakhat Quakers ami an ni a. Ṭawngṭaina ring êm êm mai, mâwlmang taka khawsa ṭhin leh taima êm êm mai an ni. School a kal lai chuan zirlai dang zawng zawng aiin science hi a tuipuiin, a ngaina a. Chung hun lai chuan school tam zâwk chuan science lam aiin Greek leh Latin ṭawng zir te an tuipui zâwk a. Quakers-ho school dinah chuan science zirna an dah pawimawh thung a. Chu sikulah chuan Joseph Lister-a pawh hi a lût nghe nghe a.

                Science rau rauah pawh hian thil nung chanchin lam zirna (biology) hi a tuipui êm êm a, a hun tam tak chu uṭawk leh sangha zir chiang tùra zai nân a hmang ṭhin a. A pa hi sumdáwng mî a ni nain, science lamah hian a tui êm êm a, enlenna (microscope) pawh a nei a. Lister-a hian chu enlenna hmang chuan mit lâwnga hmuh theih loh thilte chu enin, a zir ṭhin a, nuam a ti thei hlê ṭhin. Tichuan, naupang tê a la nih lai ṭangin daktawr, mi zai thiam (surgeon)-a ṭang turin a rilru a siam fel ta a ni. Tûnlai angin hmanruate la awm ṭha ve hek lo le, chûng hun lai chuan mi zai hna hi a la hautak êm êm a, mahse, amah hian a tui záwng tak a ni tih nu leh pa te pawhin an hria a, kum 17 a lo tlin chuan a nu leh pa te remtihnain London-ah damdawi lam zir turin a kal ta a ni. www.zolinks.com

                London-a awm tirh hian a lung a léng ve hlê ṭhin a, mahse an zirlaiah zir tur leh hriat tur a tam avângin lunglèn reh ṭhak khawpin a zir chho ta a. A zir zawh hnu chuan Edinburg khuaa damdawi in pakhatah a hun laia inzai thiam hmingthang, Dr. Robert Syme hnuaiah a thawk nghâl a. Dr. Syme hi hna la na tak mi a ni a, a hnuai a thawkte hi hna a pêk nasat ṭhin êm avângin Dr. Syme-a puia, mi an zai hmasak ber ṭum chuan a zâm chhe ve hlê a ni âwm e, a kut khûr tur pawh a dang thei hrâm a ni. Hemi chungchang a pa hnêna lehkha a thawnah chuan, “Inzai thiam tak hi ka nih theih ka ring lo, mahse rim taka ka beih chuan eng tikah emaw chuan thiam ve thaw khat chu ka la ni ve êm ang chu,” tiin a ziak a ni. Nimahsela, hun a lo kal zêl a, Lister-a chu daktawr inzai thiam leh ropui mai ni lovin, kum zabi 19-na hun laia scientist ropui leh hmingthang zigna mî a lo ni ta hial mai!

                Dr. Syme-a nên chuan ṭhian inkawmngeih tak an lo ni chho ta a, an inah pawh chuan a léng ṭhin a, Chuta ṭang chuan Lister-a leh Syme-a fanu upa ber Agnes-i chu inhre chhovin an lo inngaina ta hlê a, an innei ta nge nge a. An inneih hnu hian Edinburg-ah rei vak lo awmin chuta ṭang chuan Royal Infirmary Hospital, Glassgow-ah an insawn ta a.

                Hêng hun lai hian damdawi in hi a bâlin a la ṭawp thei hlê a, a thawhna hospital pawh hi a bâl leh ṭawp pawl tak a ni. Damlo damdawi ina an rawn dah luhte hian an natna mai ni lo, an hliam pûn avângin an thih phah fo mai a, chutiang chuan mi tam tak an zaina hliam pûn vânga thi an ni a. Lister-an nasa taka a beih hnu chuan an damdawi in pawh chu a lo thianghlim chho ve ta hlê a, mahse chuti chung pawh chuan an mi zaite hliam pûn ṭhin chuan nasa takin harsatna a la thlen tho va. www.zolinks.com

                Ṭum khat chu a ṭhianpa Dr. Anderson-a hian Louis Pasteur-a chanchin hi a hrilh a. Louis Pasteur chu Frenche Scientist a ni a. A thil zir aṭanga a hmuh chhuah pawimawh tak chu, kan chaw leh ei tùrte hi boruaka hrik tê tak tê tê, mit lâwnga hmuh theih lohte avânga lo híng leh lo chhe ta a ni a, chutiang bawk chuan taksaa hliam lo pûn ṭhin nachhan pawh boruaka natna hrik vâng a ni, tih hi a ni.

                Hê thil a hriat hian Lister-a a phûr ta hlê mai a, a chhan chu ani tán chuan kha hliam lo pûn tùr vênna damdawi ngaihtuah chiah kha a ngai tawh tih a hria a. Tichuan, hliam pûn vên nân Carbolic acid hman a rilrûk a, a hmanna tur remchang pawh a hmu ta thuai a. Mipa naupang kum 11 mi, James Greenlees chu sakawr tawlailirin a chîl avângin a keah hliam na tak mai a tuar a. Chu naupang chu Dr. Lister-a enkawl pindanah chuan an rawn dah chuan a hliam chu carbolic acid chuan uluk takin a lo silfaisak a, a lo tuamsak a. Ni tin uluk taka enkawl pahin, a hmasâwn dàn te a zir reng bawk a. Ni eng emaw zât hnua a tuamna a’n phelh chuan naupang ke kha pûn miah lovin a lo dam var mai a! Dr. Lister-a pawh chu a hlim ngei mai. Tichuan, naupang a tidam mai ni lovin, khawvêl mipuite tána thil hlu êm êm pûn vênna (anti-septic) a hmu chhuak ta a ni.

                A thil hmuh chhuah chu inzainaah chuan hmang chho nghâlin, a ṭangkaipui hlê a. Hei bâkah hian Lister-a thil hmuh chhuah pawimawh tak mai pakhat chu hêng natna hrik kan taksa hliama lût leh ṭhinte hi boruak aṭang mai ni lovin, kan kut leh kê, kan thawmhnaw leh inzaina hmanrua aṭang pawh hian a lo ni thei reng mai a ni, tih hi a ni. Chu vâng chuan Lister-a chuan mi a zai dáwn rêng rêngin a kut leh mi zaina hmanrua te chu uluk takin carbolic acid chuan a silfai hmasa ṭhin a, chumi zawhah a thawmhnaw hâk chungah chuan thawmhnaw fai dang inzainaa hâk tùr bîkin a inthuam leh ṭhin a ni. A tih dàn hi a lo lâr ta êm êm a, chawimawina pawh tam tak a dawn phah nghe nghe. A hnathawh ṭhat avâng hian Kumpinu Lalnu Queen Victoria enkawltu bîk daktawr atána ruat a ni ta nghe nghe a ni. www.zolinks.com

                Hetih hun lai hian inzaina hmuamhma ṭhui nân hiam maimaw puan (silk) hman a ni ṭhin a. Silk-ah hian natna hrik a kai theih ṭhin avângin Lister-a chuan silk aiah hian beram rîl aṭanga siam puan (catgut)-in a thlâk bawk. Chu bâkah hliam tuamna atána an hman ṭhin puan leh hrûkpuante chu tûn thlenga kan hman tâk, hliam tuamna bîk puan (gauze) hian a thlâk bawk.

                Kum 1893 khán an nupain ram dangah chawlh hmanga an zin laiin a nupui Agnes-i chuan pneumonia natna a vei ta hlauh mai a. Hê natna hi an hun lai chuan a enkawlna tùr mumal an la neih loh avângin a vei te chuan an thihpui ṭhin a. Lister-a chuan a nupui chu duat taka enkawlin, a nunna chhan tumin nasa takin bei mahse, kum 40 an inneih hnu chuan a nupui duh tak chuan mual a lo liamsan ta a ni. A nupui thi hi a tuar êm êm a, a hna thlengin a chawlhsan vek a, kum rei vak lo, kum 1912 khán kum 85 mi niin he khawvêl hi a lo chhuahsan ve ta a ni. A thih hian Britain ram pumin a sún a, mi ropui bîkte an phumna hmun Westminster Abbey-ah an phum ve ta a ni. www.zolinks.com

LEAVE A REPLY

Please enter your comment!
Please enter your name here