ALFRED BERNHARD NOBEL (1833-1898)

                Khawvêla lâwmman ropui leh hming thang ‘Nobel Prize’ hi kan hre lâr hlê âwm e. He lâwmman hi kum tinin kawng hrang hrang – physics, chimistry, literature, physiology / medicine, peace leh economics-tea mi filawr bîk leh chawimawina dawng tlâka an ngaihten an dawng ṭhin a. A hnuhnung ber ‘economics’ – a lâwmman hi chu kum 1969 aṭanga National Bank of Sweden-in a belh a ni. Kan han târ lan kawng hrang hrangah hian kum tinin mi pakhatin lâwmman an dawng deuh ber a, mi pakhat aia tamin kawng khat an dawn erawh chuan an lâwmman dawn tùr chu an insem mai ṭhin. Hê lâwmman hmingthang taka bul tumtu hi scientist ropui tak Alfred Bernhard Nobel-a a ni tih i hre tawh em?

                Nobel-a hi Sweden rama Stockholm khuaah kum 1833 October ni 21 khán a lo piang a. A pa hi lo neitu rethei tak chhúngkua aṭanga lo chhuak, harsatna tam tak pal tlanga sipai engineer hna thawk a ni a. Noble-a hian a pa hnên aṭangin thil tam tak a zir a, a pa ang bawkin thil siam leh thil hmuh chhuah lam hi a chem kalna záwng tak a ni a. A naupan chhúng zawng chuan anmahni inah, a hranpaa zirtirtu lain lehkha a zir ṭhin a.

                Kum 1842 khán Alfred Nobel-a chu a pa hnathawhna hmun Russia ram Petersburg (Leningrad an tih tâk) lamah chuan a pém ta a. Kum 16 mî lek a nih laiin chemistry a thiam êm êm tawh a, ṭawng hrang hrang – French ṭawng, Russian ṭawng, Swedish ṭawng leh Sap ṭawng te a nâl hlê a. Kum 1850 khán Russia ram chhuahsanin, Paris khawpuiah kum khat chhúng Chemistry a zir a, kum li chhúng America-ah scientist John Ericsson-a kaihhruaina hnuaiah thil a zir leh a. Chumi hnu chuan a pa hnên Petersburg-ah kîr lehin, a pa hnuaiah chuan a thawk a.  www.zolinks.com

                Kum 1859-ah an sumdâwnna lamah harsatna a lo thleng a, a pianna ram Sweden-ah hâwngin, a pa nên thil puak thei siam lam an buaipui leh ta a. Stockholm khaw bul lawka Holenberg khuaah chuan thil siamna hmun an din ta a. Ni khat chu, thil puak thei an siam ‘nitroglycerine’ chu a puak palh ta hlauh mai a. An thil siamna in a chhiat vek bâkah Nobel-a nau leh midang pali an boral a. Sweden sawrkar chuan Nobel-a chu scientist â nia ngaiin, an thil siamna chu an khârsak ta a.

                Chhiatna an tawh hnu thla khat lek aṭang chuan Nobel-a pa chu zeng natnain a tlâkbuak a, hna mumal a thawk thei lo leh ta nghâl a. Tichuan, German ramah kalin nitroglycerine siam hna bawk chu a ṭan leh ta a. Hemi hmunah pawh hian a thil siam chu a tipuak leh ta hlauh mai a. Ram hrang hrangin an rama nitroglycerine siam, lâk luh leh hman an khuahkhirh ta hlê a, chu chuan a thil siam pawh a tisukuk hle a. www.zolinks.com

                Kum 1866 khán nitroglycerine chu a dahna báwm aṭangin a lo pût chhuak a, a puak ṭhin a ni tih a hmu chhuak ta a. Tichuan, nitroglycerine pût tihul thei thil (kieselguhr) hmangin a tuam ta tlat a, him takin a kawl theih a ni tih a hmu chhuak ta a. Chutianga a siam chu a hmingah ‘dynamite’ a vuah a, lung hâlna atán zên kan hman ṭhin ang hi a ni. He a thil siam chhuah avâng hian sum tam tak a la lût ta a. Kum 1887-ah phei chuan nitroglycerine dip a siam chhuak leh ta a, chu chu ram hrang hrangin silai zênah an hmang ta bawk a. Tichuan, hma sâwn zêlin a dam chhúng hunin thil thar za lai a siam chhuak ta hial a.

                Kum 1898 December ni 10-a a boral khán dollar maktaduai kua a thihsan a. Ama duh ang ngeiin hemi pawisa pung zêl aṭang hian, kum tinin, a thih ni denchhenin Nobel prize chu mi chi hrang hrang hnênah hlan a lo ni ta ṭhin a ni.  www.zolinks.com

                Heti taka scientist ropui hi amah chawimawi nân element 102-na hmingah, ama hming chawiin ‘Nobelium’ an vuah ta nghe nghe a, Sweden ramah khuan ama hming chawiin zirna ‘Nobel Institute of Sweden’ din a ni bawk. He leiah awm tawh lo mah se, chhuan lo awm zêl turte tána inelna thianghlim leh lâwmman ropui tak a lo buatsaih avâng hian a hming a dai tawh dawn lo a ni.

                A ziaktu hi kan hre thei mai lo va, hriat theih velah dah kan lo tum dawn nia.

LEAVE A REPLY

Please enter your comment!
Please enter your name here